Tambagi ko Noy Kulas: Mas komplikado (2)

HANGTOD na karon, Noy, wa na miy kita-kita. Wa na sad siya palit og gatas sa among anak. Nagsige ko og text kon kumusta na siya ug papaliton og gatas.

Usa pa sad umanakay na ko karong October. Unsa man akong buhaton, Noy Kulas, nga duha na akong anak unya ilang amahan way klaro? Please lang, Noy Kulas, tambagi ko.

Usa pa, Noy, angay ba nako ihatag niya ang akong gimabdos karon? Babaye ra ba ang tag-an, Noy? Salamat.

MISS SCORPIO

Miss Scorpio,

Maayong adlaw diha kanimo. Nindot baya ning estorya sa imong kinabuhi kay mapanaminan sa mga batan-on nga sama nimo nasulod sa laang sa gugmang way maayong padulngan.

Magkabuang man gani nang pulos dunay trabaho ug naa pa sa hustong edad, unsa pa kaha mo nga pulos wa pa sa hingkod nga pangisip. Naa pa sa panghuna-huna nga kahibawo mo sa daghang mga butang ug kahibawo mo unsay angay nga buhaton, apan kuwang pa diay kaayo.

Labina kay wa baya kay trabaho ug minor age pa gyud intawon. Daghana ra bang mga batan-on nga sama nimo og sitwasyon. Gubot pa sa lukot ang kinabuhi nila.

Wa ka may laing mahimo niana gawas sa paghimo og legal nga lakang. Adto mog abogado aron matambagan mo sa mga proseso nga inyong pagahimuon aron makasustento siya kanunay kay sa ako sang tan-aw willing baya siya nga mohatag sa inyong anak. Ang nakaapan lang kay magsige sab kag sulti niya nga wa ganahi ang imong lolo ug nasuko.

Pasagdi na lang nang imong lolo nga nasuko, but ayaw na lang na ipaabot niya aron di sab siya maapektuhan. Kanang kasuko ug pagpanghilabot sa relasyon maoy makasamot sa pagkaguba nga unta, at this point, gikinahanglan nimo ang financial support. Praktikal na lang una mo ba.

Suwayi sa pagdangop sa Public Attorney’s Office (PAO) kon mahimo ba silang makonsulta. Libre man nang ilahang serbisyo.

Unya kontaka nang imong kanhi kapuyo o pangitaa kon asa na siya ron aron inyong maestoryahan ang kabahin nianang inyong duha ka mga anak kay siya man ang amahan niana, mosugot man siya o di. Mosugot man siya o di, iyang tulubagon ang pagsuporta kay kon di, mahimo man siyang mapasakaan og bug-at nga kaso nga duna say bug-at nga silot. Ubos man gud sa balaod, duna siyay responsibilidad ug obligasyon alang sa inyo ug ikaduha puhon nga anak bisan supak ang iyang mga ginikanan sa inyong relasyon.

Anha na ka mohukom human sa inyong panagsulti. Unsay makaayo sa mga bata, maoy buhata.

Mao nay importante karon, di ang kasuko sa imong lolo ug sa iyang pamilya. Kon ang garbo ipatigbabaw, wa gyuy maayong mahitabo.

NOY KULAS

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph