DEAR Noy Kulas,
Tagoa ko sa ngan nga Bli, nagtrabaho diri sa abroad. Kaming duha sa akong bana naa sa abroad apan siya sa laing country. Gusto unta mi mag-usa sa among work pero lisod kay naa pa mi contract nga kinahanglan humanon. Pulos maayo ang among suweldo mao nga amo lang giaguwanta ang kalayo sa usag usa. Maayo ang among relasyon bisan lagyo mi kay consĀtant ang among communication. Bisan naa mi sa among trabaho makalili mi kon gusto namo pinaagi sa internet.
Ang naproblemahan nako mao ang akong family nga among gibinlan sa among anak. Ang akong mama ug igsuon demanding kaayo namo sa akong bana, magsige og pangayo bisan unsa. Gawas nga amo silang gipadad-an og igong kuwarta nga maorag suweldo kada buwan, mangayo pa og mga butang. Masuko ra ba kon di namo mahatagan. Wa gani kuno sila magkwenta nga sila ang nag-atiman sa among mga anak samtang kami hayahay sa among trabaho sa abroad.
Masakitan ko kay wa sila kahibawo unsa ang kamingaw nga among giaguwanta aron dunay maayong future ang among mga anak. Nagsabot mi sa akong bana nga ako na lay moundang og work aron makaatiman sa mga bata. Pero dako kaayo ang mawagtang namo. Ang amo untang gisabutan nga magtigom mi og certain amount una ko moundang og trabaho kay target namo nga makabalay sa kaugalingon namong yuta ug makapundo og igo.
Apan karon maora kog na-discourage na hinuon tungod sa gibuhat sa akong inahan ug igsuon. Unsa may imong huna-huna ani, Noy Kulas? Mopadayon pa ba ko ini?
BLI
Bli,
Kon magpadala ka sa imong emosyon, maguba gyud ang inyong plano. Apan kon mohimo mo og alternatibong mga plano sama sa pagkonsulta usab sa pamilya sa imong bana aron matabangan mo. Ayaw lang ninyo pahibaw-a sa inyong problema aron di mo-create og tension tali sa imong pamilya kay seguradong masuko nimo ang imong inahan ug igsuon kon imo ning buhaton. But first ka mohimo ani, kon duna kay laing masaligan sa imong pamilya sama sa imong laing igsuon o iyaan, sumbongi sa imong problema. Ang duha ka mga ulo mas maayo kay sa usa. Kon makatabang ni pag-atiman sa mga bata, mas labing maayo.
Ang inyong gibuhat alang sa kaayuhan sa imong mga anak ug sa imo mismong pamilya.
Busa, kon akoy naa sa imong dapit, di ko maghuna-huna kon ikasuko kini sa inahan ug igsuon. Kay ang ilang gibuhat pangabuso man sa imohang kaayo. Di sila makaingon nga gitabla nimo sila tungod kay imo silang gipadad-an og binuwan nga amount. Dautan unta kini kon imo lang gi-thank you ang ilang serbisyo. Apan wa man, nagpadad-anan ka man nila.
Mahitabo gani nga way makatabang sa imong pamilya, una ka pa modangop sa pamilya sa imong bana. Kon wa gihapoy makatabang, that is the time nga maghuna-huna ka sa pag-uli diri.
NOY KULAS
Alang sa imong problema, e-mail lang sa: kulassuper@sunstar.com.ph. Suwat sab sa: Tambagi Ko, Noy Kulas, Sun.Star bldg., P. del Rosario st., Cebu city