Tambagi Ko Noy Tikyo: Malas

DEAR Noy Tikyo,

Ang akong problema bahin sa gugma. Kaniadto naay nanguyab nako nga duha ka lalaki nga pulos mga ulitawo. Ang usa propesyonal samtang ang usa yano lang nga empleyado sa kompaniya.

Nahigugma unta ko sa propesyonal ug hapit ko na siya sugta, apan sa wa ko masayring rason, kalit lang nga wala na siya mamisita nako og balik.

Nagmahay hinuon ko kon nganong wa ko dayon siya sugta. Malas seguro ko sa gugma. Kay ikatulo na unta siya nakong uyab kon nahitabo pa. Apan sama sa duha, pakyas ko. Usahay makaingon ko nga malas gyud tingali ko sa gugma.

Human ang usa ka bulan, nahimamat ko ang laing lalaki nga ako na sab nga naibgan. Nanguyab siya nako ug ako dayong gisugot. Apan ang problema kay minyo siya.

Daghan ang nagtambag nako nga biyaan ko siya kay sala ang among relasyon.

Apan para nako lisud siyang kalimtan. Gani mas pilion ko pang kalimtan ang tanan, inay siya. Akong gihatag ang tanan aron unta nga maako siya. Apan ning mga uwahing adlaw, nausab siya. Mora og iya na kong gilikayan. Grabe kasakit sa akong gibati. Malas gyud kaha ko sa gugma?

MARIELLE

rMarielle,

Sa tinuod lang, wa may malas sa gugma kay moabot ra man kini sa tawo nga di damhon. Ang nahitabo kanimo, ayaw isipa nga malas, kon di natayming lang gyud nga di sila maoy gitagana sa Ginoo para nimo.

Kay kon kadtong propesyonal kon siya pa ang gitagana sa Ginoo para nimo, magkauyab gyud mo niya. Busa ayaw sayangi ang higayon nga wala mo magdayon. Natayming ra pod nga wala dayon nimo siya sugta, kay useless man lang gihapon kay di man siya tinuod sa iyang pagbati nimo.

Nagpakita lang kadto nga taphaw ra ang iyang pagmahal kay wala man siya makalahutay. Wala man siya makapaabot kon kanus-a nimo siya sugton. Wa siya makaantus.

Kay ang tinuod nga gugma makahulat ug maka-antus tungod ug alang sa tawong gimahal.

Sama ra sab ni sa nahitabo sa lain pa nimong mga gikabulag nimong hinigugma. Actually di pa sila ang nilalang nga buot sa Ginoo nga imong ikauban.

Kining minyo nga imong nauyab apan nausab, aw, expected na man kini tungod sa iyang sitwasiyon. Nasayud ka na man nga sooner or later biyaan ka gyud niya kay di man ikaw ang iyang asawa. Giluiban gani niya ang iyang asawa, ikaw pa nga way labot sa iyang kinabuhi?

Kay mituo ka pa lang unta sa tambag sa imong mga higala, di na moabot niining puntoha nga mag-self pity ka.

Ayaw kabalaka, kay duna pa gihapoy lalaki nga mahigugma nimo. Wala pa lang nimo mahibalag. Apan segurado ko nga time will come, kon pagbuot sa Ginoo, moabot ra siya sa imong kinabuhi.

r

NOY TIKYO

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph