DEAR Noy Tikyo,
Tagoa ko sa ngan nga Marc, 20. Nagtrabaho ko karon isip family driver sa usa ka pamilyang buotan.
Buot lang kong mangayo og tambag nimo bahin ning akong kahimtang karon. Naa man god koy uyab nga akong napamabdosan, susama ra nako og edad.
Wala man god ko magdahom nga moabot ning higayona nga momabdos siya kay migamit man ko og withdrawal.
Andam unta kong mangawasa niya, pero problema lagi kay wa man koy kuwarta nga ibuhi niya, ilabi na gyud sa umaabot namong anak. Gamay ra gyud ang akong suweldo isip drayber ug di makaimpatar kay nagtabang sab ko sa akong pamilya.
Wala pa mahibawo ang among mga ginikanan bahin sa nahitabo kay di namo buot nga makurat sila.
Unsay angay nakong buhaton ning akong suliran karon. Wala na gyud koy laing kadangpan, gawas kanimo. Salamat.
Marc
*****
Marc,
Barugi ang imong responsibilidad ngadto sa babaye. Bisan pa og moingon kang wala nimo damha nga mahitabo kini, apan ang paghimo sa ingon sayud ka nang daan nga mosampot gyud niining sitwatsiyona karon.
Inyo man kaha ning sinabutan, angay lang sab nga imo siyang unongan sa iyang kahimtang karon.
Ayaw na og pangita og alibi aron nga malingkawas ka sa maong sitwasiyon. Maayo man lang gani kay duna kay gamay nga kapangitaan. At least duna kay gamay nga kuwarta, ang uban gani, wala gyud bisan gamay.
Di ka ba maluoy sa babaye ug sa mamahimo ninyong anak, kon imo siyang daganan? Konsensiya sab na nimo. Mao nga naa ka na man sa maong sitwasiyon, dawata na lang ug unongi siya.
Usa sab sa angay ninyong buhaton, mao ang pagpahibawo sa inyong mga ginikanan. At least pinaagi niini makatabang sab sila sa inyong sitwasiyon. Kay kon taguon ra ninyo ang maong suliran, aw, segurado nga mosamot nga magproblema ka.
Pinaagi sab niini, di na sila mag-expect kaninyo nga makahatag pa mo sa inyong suweldo kanila kay duna na man moy tagan-an unya niini. At least makasabot sila kon nganong di ka na makasuporta kanila.
Ayaw na og pagbasol kon nganong nahitabo kini kaninyo. Inyo man ning sinabutan, busa mag-unong mo kay nagkahigugmaay man kaha mo. Gawas pa, alang man sab ni sa kaayohan sa inyong mamahimong anak.
Noy Tikyo