Tchoukball team sa siyudad mibida sa pelikula

BIDA ang pipila ka magduduwa sa siyudad sa duwang Tchoukball sa dokumentaryong "Kung Giunsa Pagbuhat Ang Binisayang Chopsuey" ni Charliebebs Gohetia.

Ang shortf ilm midaug og Special Jury Mention sa 1st Cinetotoo Film Festival sa GMA News TV.

Ang istorya nagtuyok sa kasinatian, kaagi, mga hagit nga giatubang sa tchoukball team dinhi, hilabi na sa paningkamot nila karon nga sila marekognisa sa nasyunal nga level aron makaduwa sa internasyunal nga kompetisyon.

"Bale naa lang gyuy misunderstanding nga nahitabo between us dinhi sa Davao ug sa national till miabot sa punto nga gi-ban nila ang Davao to play sa mga national events. Sakit kaayo para sa amoa mga leaders, hilabi na nga nakita namo ang effort sa atong mga players. Kesyo ana lang sila, di sila well-off, tratuhon lang og ingon ana. Champion baya ta kung buot huna-hunaon," ni Cindy Matabalan, general secretary sa Tchoukball Association of Davao sa pakighinabi kaniya.

Mga magduduwa sa dakbayan gikan sa nagkadaiyang sektor, nga nakakita'g dugang kadasig, nausab ang kinabuhi, human malambigit sa samang isports.

"Naa tay players nga OSY, tapos naa say children in conflict with the law. Kanang makita nimo ba ang kausaban sa ilaha, ang interes nga nausab gyud sila, naningkamot sila."

Gawas nila, duna say mga nanarbaho na, estudyante nga nahilig sab sa maong duwa.

Taud-taod na, sukad gipaila-ila ang tchoukball dinhi sa dakbayan, diin ang men ug women's tim dinhi gideklarang kampeyon sa 2nd Philippine Open Tchoukball Championships niadtong Enero 2012 nga gihimo sa Cebu City.

Samtang atol sa 5th Asia Pacific Tchoukball Championships sa Bacolod City sa samang tuig, ang women's team mipupo sa silver samtang ang lalaki milabni sa bronse.

"Karon nga gi-ban nila ang Davao, makita nimo nga nawad-an gyud og moral ang mga players nato. Sa film, makita sab didto among effort sa pag-reach out nila, nagsuwat mi, nangayo kog sorry, pero wala gihapon. Nanghinaut na lang mi nga in time, ma-okay ra ang tanan."

Karong Disyembre 9, kabahin sa 10th Mindanao Film Festival ipasalida ang short film diha sa Gaisano Mall ning siyudad.

Samtang gikumpirma sab ni Matabalan nga i-feature sab sila sa dokumentaryong Motorcycle Diaries ni Jay Taruc nga moanhi dinhi sa dakbayan aron personal silang mahimamat, uban ang tim.

Sa kasamtangan, gitutok sa tim ang atensiyon nila sa local events ug pagpanudlo sa ubang indibidwal nga interesadong makisayod sa maong matang sa isports.

"Pero laban lang gihapon mi. Di mi kaduwa sa national, so among gihimo diri mi sa local level lang, then gina-share sab namo sa uban among nahibaw-an, daghan og queries na moanhi dinhi gikan sa ubang lugar aron magpatudlo lang," panapos ni Matabalan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph