Todino: Death penalty na sab?

WA mokunhod ang kremin sa mga nasod nga nagpatuman og death penalty. Gani, duna may mga Filipino karon nag-atubang og silot kamatayon sa uban nasod tungod sa ilang kalambigitan sa illegal nga drugas o pagpatay.

Dinhi sa Pilipinas, dugay rang gipahunong kining death penalty isip silot sa mga heinous crime o mga niloog nga kremin.

Apan sa miaging semana, giduso sa Volunteers Against Crime and Corruption kining sugyot nga ibalik ang pagpahamtang og silot kamatayon.

Dali usab dayon nga gisupak angmaong sugyot sa Malacanang ug Catholic Bishops Conference of the Philippines.

Gikinahanglan ba gyud ang silot kamatayon?

Naproybahan na nato nga walay dakong epekto ang death penalty kaniadto. Daghan gihapon ang naghimo og kremin nga angay silotan og kamatayon.

Ang risgo lang niini mao nga magamit ang silot kamatayon paggukod sa imong kaaway kon duna kay igong kwarta. Usahay man gud, murag kwesiyonabli ning desisyon sa Korte. Kon pobre ang akusado, mabilanggo bisan walay sala. Kon mamatud-an nga sad-an, mas dako pag sentensiya kon itandi sa kremin nga nahimo.

Duna bay adunahan nga gipahamtangana og death penalty kaniadto?

Mas daghan baya gyud sa mga tawo nga anaa sa kawad-on nasud karon sa prisohan. Kon ibalik ang death penalty, segurado daghan pod kanila ang masilotan og kamatayon. Bentahan man gud ang adunahan, maka-hire og banggiitang abogado, ug mahimo ilangay pa ang husay sa kaso og pila ka tuig.

Dali ra mapug-ok sa mga adonahan ang ilang kaso. Pinaagi sa ilang bahandi mahimong patuyokon nila ang dagan sa hustisya.

Kon ilakip tingali kining makonbikto sa kasong corruption, pagpangawkaw sa kwarta sa gobiyerno gikan sa P1,000 pataas, tingali mausab akong baruganan aning pagpabalik sa death penalty.

Sa tinuod, kon duna may angay silotan og kamatayon mao kadtong mga opisyal nga nangawkaw sa kwarta sa gobiyerno kay ang maong kremin naglambigit kana sa tibuok katawhang Filipino nga nakuhaan sa ilang katungod pagpahimulos unta sa benepisyo ug serbisyo gikan sa gobiyerno.

Ato nalang tarungon kining pagpadagan sa sistema sa hustisya inay ibalik kanang death penalty. Dili nato hikawan sa inila ug banggiitang mga abogado ang mga pobreng akusado. Itaral sa hukmanan kanang mga kurakot nga mga opisyal. Ug palamboon nato ang ekonomiya aron makatrabaho ang kadaghanan ug labaw sa tanan, pulpogon nato kining suliran sa drugas nga maoy utok aning mga dagkong niluog nga kremin.

Dili man death penalty maoy solusyon aron mahunong kining mga kremin. Suma gud, nikunhod ba ang kremin sa ubang nasod nga nagpatuman og silot kamatayon? Tinuod, lisod atakihon ang kreminalidad apan dunay daghang paagi pagsumpo niini, kana kon mismo ang atong tigpatuman sa balaod maoy unang mogukod sa mga kreminal sud sa ilang buhatan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph