Todino: Kidnapping, negusyo

MAHIMONG tuohan nato ang sulti sa Malacanang nga ang ulahing pagpang-kidnap sa duha ka mga langyaw sa Tawi-Tawi dili makaapekto sa industriya sa torismo sa nasod.

Apan, sa pikas bahin, dunay pagtuo nga dako kinig epekto sa imahin sa Pilipinas tungod kay natandog niini ang seguridad ug kahapsay sa atong nasod.

Ang katarungan sa Malacanang nganong dili maapektohan ang pagdagsang sa mga torista mao nga wala mag-inusara atong nasod kabahin sa problema sa pagpangdagit.

Sa miaging semana, sila si Elwold Horn, usa ka 52 anyos nga Dutch national ug Lorenzo Vinciguerra, 47-anyos nga Swiss national gipangdagit sa armadong mga tawo sa Parangan, Panglima Sugala, Tawi-Tawi.

Dugay na kining problemaha ug nasayod ang kadaghanan nga dili gyud luwas ang mga ngilit nga dapit sa Mindanao batok sa pagpangdagit – labi na diha sa Jolo ug Tawi-Tawi – kay naa man ganiy kidnapping sa Zamboanga, Basilan ug bisan sa General Santos diha pa sa ‘awa-aw’ nga lugar.

Ang nakaparat sa atong gobiyerno kay matag kidnapping ato dayong ilambigit ang terorismong kalihukan.

Nahibaw ang gobiyerno nga gihimo nga kining negosyo sa mga armadong grupo. Kining kidnapping gipundohan kini og dakong puhonan kay minilyon ka pesos sab ang mahimong ginansiya niadtong mga mastermind.

Mga sinuholan lamang kining mga armadong grupo nga mirisgo sa ilang kaugalingon. Bahinan lamang kini sila og gamay kon magmalamposon ang pagkuha sa ransom money.

Timan-i ra gud, matag kidnapping walay laing demanda ang mga kidnapper gawas sa ransom money. Wala silay politikanhong demanda sa gobiyerno paghatod og mensahi sa ilang kausa batok sa pamunoan.

Usahay, kon duna silay kauban nga napriso, iapil nila sa demanda ang pagpabuhi sa ilang kauban apan dili kana maoy basihan nato nga dunay kausa ug politikanhong motibo kining ilang kalihukan.

Ug nasayod ta nga imposibli sa paghugpong sa armadong grupo kon walay kapitalista nga nagpaluyo nila. Kinsa man lugar ang mipalit nila og mga armas, kinsa ang misuweldo?

Nganong mosiaw man pod ning kidnapping kong magsingabot na ang eleksiyon?

Busa, angay tingali tuohan ang Malacanang, kana kon ingnon nila nga kining kidnapping dili binuhatan sa mga teroristang group apan hinimoan kini sa mga dagkong sindikato nga nagpadagan sa nagkadaiyang illegal nga negusyo sa nasod sama sa smuggling, drugas, sugalan, prostitusyon ug uban pa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph