Todino: Pulido ug baga

Abi nako og naundang na kining problema sa paggamit og sakyanan sa gobiyerno alang sa personal nga katuyoan.

Kining awhag bitaw ni lawyer Alfredo S. Reyes, ang regional director sa Commission on Audit, ngadto sa publiko nga i-report kadtong mga sakyanan sa gobiyerno nga gigamit sa dili insaktong paagi, dali ra kaayong malutsan.

Bisan pa kon makadaghan tingali mo-report ang publiko batok sa non-official use sa mga sakyanan sa gobiyerno, layo kaayo ang posibilidad nga masilotan ang malapason. Ngano man? Daghan kaayog lusot ang atong mga opisyal. Pwede sila mangatarungan nga gigamit ang sakyanan subay sa ilang trabaho sa gobiyerno bisan tataw kaayo nga giparada diha sa shopping mall, videokehan, sa mga beach, labi na sa adlawng Sabado o Domingo.

Pero sulayan nato kon duna ba gyuy aksiyon ang COA batok niining pagpataka og gamit sa sakyanan sa gobiyerno.

Ang solusyon bitaw aning tanang, para nako, hunongan na unta kining pag-isyu og sakyanan sa atong mga opisyal. Kay ngano, dili ba diay sila maka-serbisyo sa publiko nga gamiton nila ilang kaugalingong kotse, o kon mag-PUJ o taksi sila paingon sa trabahoan?

Ang nakaparat gud sa atong gobiyerno, ang mga department heads isyuhan pa og sakyanan bisan ang departamento nila duna nay sakyanan.

Panahon na tingali usbon sa gobiyerno kining pagpang-isyu og sakyanan.

Mas maayo daghanon natog pagpalit og mga firetruck, ambulansya, garbage truck, ug mga heavy equipment para sa road repair ug maintenance kay sa mopalit og mga sakyanan para sa mga opisyal sa gobiyerno nga kanunay gamiton sa personal nga katuyoan.

Pustahay ta, kon imong pangutan-an kining tanang opisyal nga gi-isyuhan og sakyanan, kon gigamit ba nila sa personal nga katuyoan - basta dili lang molimod, walay usa nila makabarog nga wala makagamit para sa ilang personal nga interest.

Niadtong Biyernes diay gipahibaw ni Kongresista Rufus Rodrigues nga duna nay dugang pundo alang sa South ug North Divisoria road concreting gikan sa pundo sa nasudnong kagamhanan.

Dako-dako gyud ang maong kwarta kay moabot gud og P19 milyones.

Pero, tag-anon nato, sama sa ubang road project, duha ngadto sa lima ka tuig gikan sa pagkakompleto, kining proyektoha magkinahanglan na pod ug pundo alang sa repair ug maintenance.

Kon buot subayon, walay bag-ong proyekto kining mga opisyal nato sa gobiyerno. Ang ilang gibuhat mao ra gyud kining pag-ukal sa gisamento nga karsada aron ilisan og bag-ong aspalto o samento. Itudlo daw bi kon duna bay karsada nga niluntad og 10 ka tuig nga wa moagi og repair.

Unsa may deperensiya sa karsada sa ubang nasod og dinhi sa atoa. Parehas ra og materyales ang gigamit. Nganong molahutay man og dugayng panahon ilang karsada una pa magkinahanglan og repair. Ang deperensiya, ang ilang karsada pulido ug baga ang pagkasemento, sa atoa baga ug polido ang nawong sa nagpagama og karsada.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph