PINANGULOHAN ni Tony Parker, unom ka mga magduduwa sa hosts San Antonio Spurs ang nakamugna og double-digit puntos sa ilang paglampornas sa Orlando Magic, 121-112, kagahapon sa National Basketball Association (NBA).
Si Parker nipupo’g 30 puntos, nidugang og 24 si Manu Ginobili, niamot og 17 si Kawhi Leonard, nitunol og 14 si Tiago Splitter, nihatag og 12 si Danny Green samtang nitampo og 11 si Tim Duncan alang sa Spurs.
Ang Spurs, nga mingsaka sa 46-16, ningposte sa ikaunom nilang sunodsunod nga kadaugan.
Knicks 107, Cavaliers 97
Nagpakatap og 26 puntos si Carmelo Anthony aron pangulohan ang kadaugan sa New York Knicks batok sa Cleveland Cavaliers.
Ngil-ad nga nakasugod sa duwa si Anthony apan sa ngadto-ngadto, naulian ang opensiba niini. Nidugang og 17 puntos ug 12 rebounds si Amare Stoudemire alang sa Knicks.
Ang Cavaliers gipangulohan ni Kyrie Irving pinaagi sa iyang 30 puntos.
Jazz 104, 76ers 92
Nagkumboya sila si Gordon Hayward ug Alex Burks aron pangulohan ang kadaugan sa Utah Jazz batok sa host Philadelphia 76ers.
Si Hayward nimugna og 22 puntos samtang nihatag og 19 si Burks alang sa Jazz, nga ningsaka sa 22-41 nga rekord.
Kini maoy ika-16 nga sunodsunod nga kapildihan sa 76ers, nga nangasukarap sa 15-47 nga rekord.
Grizzlies 111, Bobcats 89
Nanginit ang opensa sa host Memphis Grizzlies sa 2nd half aron kusokusuon ang Charlotte Bobcats.
Ang kainit sa opensa sa Grizzlies sa 2nd half gidugkatan nila ni Mike Conley ug Zach Randolph. Si Conley adunay 20 puntos samtang nihipos og 16 puntos si Randoplh.
Ang Bobcats gipangulohan ni Al Jefferson pinaagi sa iyang 16 puntos samtang nitampo og 15 puntos si Chris Douglas-Roberts.
Wizards 114, Bucks 107
Gimugna ni Bradley Beal sa 4th quarter ang 12 sa iyang kinatibuk-ang 23 puntos aron tabangan ang Washington Wizards sa pagkitkit sa Milwaukee Bucks.
Ang Wizards nakaposte og 28 puntos nga labaw sa 2nd quarter apan sa wala damha, nakaduol pagbalik ang Bucks, 101-104, sa nahabiling 2:13 minutos.
Maayo na lang kay nakalingkawas ang Wizards sa grabeng pagpanghudlat sa Bucks sa hinapos nga bahin.
Clippers 109, Hawks 108
Gipatapsingan sa host Los Angeles Clippers ang Atlanta Hawks sa kulbahinam kaayo nga duwa.
Gipangulohan ni Blake Griffin ang kadaugan pinaagi sa iyang 27 puntos ug walo ka rebounds samtang nidugang og 19 puntos si Chris Paul.
Ang Hawks gipangulohan ni DeMarre Carroll pinaagi sa iyang 19 puntos. (AP/ESL)