Tresurera sa barangay nga gireklamo, gidepensahan

TAGUM CITY - Gidepensahan sa mga barangay functionaries ang gireklamong barangay treasurer tungod sa pagpasagad sa iyang trabaho.

Usa sa mga midepensa mao si Barangay Kagawad Anecito Dumat, officer-in-charge sa Barangay Mankilam, Tagum City.

Si Dumat midepensa kang Silfa Alcambra, appointed barangay treasurer sa maong barangay.

Si Alcambra gireklamo sa katawhan tungod kay nadelatar ang paghatag sa benepisyo sa mga senior citizens.

Gawas pa niini, suma sa reklamo, daghang trabaho ang wala maasikaso ni Alcambra.

"Dili na tinuod ang pasangil nga dili mosipot among treasurer. Modiretso naman gud na siya didto sa City Hall kay mag-asikaso sa mga transaksiyon mao nang usahay dili na siya makit-an dinhi," pahayag ni Dumat.

"Ka-maayo anang among treasurer, ah, lahi sa unang treasurer nga nagkabulilyaso," dugan ni Dumat sa Superbalita.

Si Dumat maoy mihulip sa barangay sanglit nagbakasyon si Kapitan Tony Rio didto sa Leyte.

Gibutyag ni Dumat nga sa wa pa mibiya si Kapitan Rio, gisultihan na si Alcambra nga mohapit sa barangay hall sa di pa niya asikasuhon ang transaksiyon sa gawas aron way ikasulti ang mga kritiko.

"Kung sa performance lang sa tabaho, maayo gyud nang among treasurer. Plastado ang tanan kay bisan og singko sentabos gitarong gyud niya na og pahimutang," dugang ni Dumat.

Nagtuo ang opisyal nga dunay mga tawo nga buot lamang masamok ang barangay mao nga ilang gireklamo ang tresurera sa barangay. (Teddy Cabana)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph