ATENSYON sa mga tag-iya og automatic tubig machine (ATM) kansang mga makina gipangladlad sa sidewalk.
Ang Prevention Rehabilitation Order Beautification Enhancement (Probe), Garbo Asenso Sumbanan Alyansa (Gasa) ug City Health Department (CHD) mosakmit karong buntag sa nagpasad nga mga ATM nga way nag-atiman.
Matod ni Dr. Stella Ygoña nga subay sa ilang pakisusi nga gihimo sa nakalabay nga mga buwan, pito sa 14 ka mga ATM machine sa barangay Pahina Central nga gipangbutang sa sidewalk ang positibo sa E. Coli bacteria kun hugaw sa tawo.
Ang maong pagtuon gihimo sa CHD dihang nihugpa ang pagpanakit sa mga tiyan sa mga lumolupyo sa lugar hinungdan nga ilang gihimoan og pakisusi.
Dugang ni Ygoña nga ilang ilakip sa pagsakmit kadtong mga coffee vending machine nga naa daplin sa karsada nga daling maabogan.
Padayag sa hepe sa CHD nga kadtong mga ATM nga anaa sulod sa mga balay o establisemento kinahanglan mokuha og sanitary permit ang tag-iya ug health card alang sa mga caretaker.
Si Dr. Lucelle Mercado, hepe sa Gasa, nagkanayon nga ang ilang tuyo di ang pagputol sa “buhaybuhay” sa mga tag-iya apan ang pagsiguro nga luwas ang publiko.
Gawas nga peligro alang sa mga tawo nga makainom, nakababag usab ang mga ATM ug coffee vending machine ngadto sa mga tawo nga moagi sa sidewalk, pasabot ni Wendell Cenas sa Probe.
Si Raquel Bohol-Arce, hepe sa Probe, nitug-an sa Sun.Star Superbalita nga magsugod ang ilang operasyon nga langkuban sa tulo ka mga grupo karong alas 9 sa buntag apan siya nagdumili sa pagbutyag kon asang dapita sila magsugod sa pagpangronda.
Mga ATM nga masakmit mamahimong malukat sa tag-iya bugti sa P500 nga multa hangtod tulo ka higayon apan kon subling masakmit maimbargo kini pabor sa gobiyerno.
