Tulisan gipusil sa gitulis, namatay

TULISAN namatay human naigo sa ulo sa iyang pagpakigpinusilay sa tag-iya sa gasoline station nga ilang gitulis niadtong Dominggo sa alas 10:25 sa gabii sa Barangay Luray 2, dakbayan sa Toledo.

Si Randy Jakosalem, 28, kanhi security guard, dunay kapuyo, lumad nga taga Guihulngan, Negros Occidental, napusilan ni Raul Monsanto, tag-iya sa Shell gasoline station.

Ang tulo ka mga kauban sa suspek, nga naglakip sa usa ka babaye, nakaeskapo apan giingong usa ka­nila samdan.

Si Chief Insp. Michael Anthony Bastes, hepe sa Toledo Police Station nga nahinabi sa dySS Super Radyo ugSun.Star Superbalita, nagkanayon nga si Monsanto maoy nakaigo ni Jakosalem atol sa sinukliay sa bala.

Si Monsanto samdan sa abaga, apan di grabi.

Lakip nga nasamdan ang pump boy nga si Wiljun Nacua, 20, ulitawo, taga Cabangcalan Negros Occidental, nga naigo sa walang tuhod.

Si Bastes niingon nga niabot ang upat ka mga tulisan sakay sa duha ka mga motorsiklo, usa niini babaye ug ni-park duol sa cashier’s booth.

Ang duha nga naka-helmet maoy ni posisyon duol sa cashier’s booth dayon niibot sa armas ug nideklarar gilayog tulis.

Ilang gimanduan ang cashier nga si Jose Cristituto Tanoco, 35, minyo, sa paghatag sa kuwarta.

Usa sa mga tulisan nisulod sa cashier’s booth, gikuha ang P6,000 ug duha ka mga cellphone.

Sa wa pa makabiya sa lugar ang usa sa mga pump boy nga si Aron Perequin, 20, ulitawo, nakadagan paingon sa quarters sa likod diin didto ang ang balay ni Monsanto.

Gipusil sa makaduha ka higayon si Perequin sa usa sa mga tulisan, apan wa siya maigo.

Ang kaubang pump boy nga si Wiljun Nacua maoy naigo sa tuhod dihang nigawas gikan sa kwarto.

Si Monsanto nga napahibawo nigawas gilayon nga nagdala og armas hinungdan nga nahitabo ang pinusilay ug naigo sa ulo si Jakosalem.

Ang tulo ka mga kauban, diin usa babaye, nakasibat apan sumala sa mga saksi nga gikatahong dunay nasamdan kanila.

Sa pagsusi nila sa lawas, nailhan si Jakosalem base sa pay slip nga nakuha sa pitaka niini nga maoy nakagiya usab nila sa pagsubay sa pagkatawo niini.

Matod ni Bastes nga ang identification card nga nakuha gikan sa pitaka iya sa usa ka tawo nga nii­ngon nga biktima siya sa pagpanguot sa dalan Colon niadtong Marso.

Si Bastes niingon nga ilang gisubay kon si kinsay tag-iya sa Suzuki Rider, kolor itom, nga may temporaryo nga plaka 2415-TXO ingon man ang Armscor.38 caliber revolver.

Nasubay nila nga si Jakosalem nagpuyo sa may duol sa South Road Properties (SRP) sa dakbayan sa Talisay ug nakaalagad isip security guard, apan gitaktak kay nanion og pusil sa kauban.

Ang grupo ni Jakosalem maoy responsabli sa pagtulis sa Platinum Gasoline Station mga alas 10:15 sa samang gabii sa Barangay Luray ll gihapon diin nadala nila ang P7,000 una pa nila gitulis ang Shell Gasoline Station nga kasikbit ra.

Matod ni Bastes nga nakig-alayon na sila sa kapulisan sa Minglanilla, Balamban, ug ubang mga lungsod diin gipangtulis ang mga gasoline station.

Siya niingon nga gamay ra ang mao nga grupo.

Si Sr. Supt. Noel Gillamac, director sa Cebu Provincial Police Office (CPPO), nagkanayon nga mas ma­kaayo kon ang mga security guard ipailawom og mas maayong training kay sila ang first line of defense.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph