NASIKOP sa kapulisan sa Mandaue City ang tulisan sa jeep de pasaheroan human manulis
ug nakulatahan sa mga estambay samtang nakuhaan pag shabu.
Nahitabo ang insidente niadtong Sabado pasado alas 8:00 sa buntag sa dan A.S. Fortuna eskina P. Remedio, Barangay Banilad.
Ang nasikop giila nga si Felimon Cuambot, 19, nagpuyo sa Villagonzalo 2, Barangay Tejero, dakbayan sa Sugbo.
Samtang, ang biktima giila nga si Mary Rochell Cabreza, 16, molupyo sa Barangay Basak, dakbayan sa Lapu-Lapu ug usa ka tinun-an.
Sigun sa taho nga ang biktima sakay sa usa ka PUJ paingon sa University of San Carlos dihang ang iyang kaubang pasahero kalit mideklarar og tulis dayong ti-on og kutsilyo.
Ang biktima way nahimo gawas sa paghatag sa iyang cellphone apan nisuway sa pagsukol ang biktima ug nangayog tabang sa mga tawo.
Hinungdan nga naalarma ang mga estambay ingon man ang duha ka motorcycle cops nga sakop sa Station 4 nga si P01 Oliver Gipanao ug PO1 Gerald Suquib.
Matod ni PO1 Dennis Esprada nga nahinabi sa Sun.Star Superbalita nga nasikop ang usa sa duha ka mga suspek nga si Cuambot samtang ang kuyog niini nga naila sa pangalan nga Laile nakaeskapo.
Ang suspek way suwerti tungod kay nakulatahan sa mga estambay samtang atol sa pagrekisa nakuhaan kinig kutsilyo, plastic nga ang sud gituohang shabu, mga shabu paraphernalia ug ang nadalang cellphone gikan sa biktima.