Umagad gipatay sa ugangan

USA ka umagad ang namatay human gitigbas sa iyang ugangan nga gikalalis samtang nag-inom alas 12:00 sa udto niadtong Sabado didto sa barangay Tibungco, siyudad sa Davao.

Namatay mao si Norberto Naupan Yongot, 49, minyo, mag-uuma, nagpuyo sa San Roque, Acasia, Buhangin District, ning siyudad.

Si Yongot nakaangkon og samad sa iyang abaga ug ubol-ubol dihang gihapsan sa hait nga sundang ni Wenceslao Luceño, 63, minyo, nagpuyo sa Purok Upper Communal, Barangay Tibungco.

Base sa spot report sa Bunawan Police Station, sa wa pa nahitabo ang insidente nag-inom ang biktima ug suspek didto sa Steepside Valley, Purok 8, Tibungco.

Nasayran nga samtang nag-inom ang duha, nagkalalis sila mao nga mikuha og hait nga sundang ang suspek dayon gitigbas ang umagad nga miresulta sa iyang kamatayon.

Ang suspek, kinsa nakonsensiya sa gibuhat, mitahan sa iyang kaugalingon pagka-alas 4:45 sa hapon didto sa Bunawan Police Station diin giandam ang kasong pagpatay batok kaniya. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph