NIHANGYO ang usa ka psychiatrist sa publiko nga undangon na ang pag-bully sa usa ka menor-de-edad nga babaye nga gireklamo nga nangawat og mga sinena ug ubang butang sud sa usa ka boutique sa usa ka mall sa dan A.S. Fortuna, dakbayan sa Mandaue.
Si Dr. Rene Obra, pangu sa Center for Behavioral Science sa Vicente Sotto Memorial Medical Center, niingon nga makasamot lang sa problema sa dalagita ang pagsige og bully.
“Please stop bullying diha sa atong internet kay this is not advisable kay mo add-on lang ni sa problema sa bata nga na-traumatize tungod aning nahitabo karon,” hangyo niini ngadto sa publiko.
Siya nabalaka nga moresulta sa suicide ang bullying nga maoy gibuhat sa ubang mga batan-on nga gibugalbugalan sa ilang mga classmate o higala.
Matod niya ang hitabo di lamang makaapekto sa dalagita kondili apil usab sa pamilya niini.
Sa iyang Facebook account, si Shirley (di tinuod nga pangalan), nipadayag og kahiubos sa mga tawo nga grabeng nakabiaybiay niya ug nakabungat og sakit nga mga pulong human sa iyang nahimo.
“I can’t help but cry,” pahayag niini sa iyang account sa Facebook.
Apan kon adunay mga mibiaybiay niya, aduna usab mga nidasig ug nipaabot sa ilang suporta ug pag-ampo ngadto sa dalagita.
“Lahat naman tayo nagkakamali. Ang mahalaga marunong ka tumanggap sa mga pagkakamali mo at marunong humingi ng tawad,” usa sa mga madasigon nga mensahe nga gi-post alang kang Shirley.
Ang amahan sa menor-de-edad nikonsulta na sa buhatan ni Obra alang sa medikal nga intervention niini nga giingong dunay impulse control problem nga gitawag og kleptomania.
“Kini siya ang usa ka tawo nga naghimo ani gihimo niya kay he cannot resist the impulse. Kuhaon niya ang usa ka butang but it is not for the monetary reasons. Ang maong butang dili niya gamiton, dili niya iprenda, (ug) dili niya ibaligya,” pagpasabot niya.