NAPUSGAY ang ulo ug nituasik ang utok sa usa ka delivery boy sa dihang naligsan ug gidaro sa dan sa usa ka private van sa Airport Road, Barangay Pusok, dakbayan sa Lapu-Lapu kagahapon sa kaadlawon.
Ang namatay magkuha unta sa purchased order (PO) card busa niapas sa iyang live-in partner nga female guard sa Waterfront Airport Hotel and Casino aron ikapangumpra sanglit adlaw’ng natawhan sa ilang anak kagahapong adlawa.
Sumala sa mga kawani sa Cosmopolitan Funeral Homes, Pajo branch, sila na ang namunit sa nituasik nga utok ug nabuwag nga bagulbagol sa biktima nga si Julito Hernandez, 28, adunay live-in partner nga taga sityo Riverside, Barangay Canduman, dakbayan sa Mandaue.
Nasayran nga naglakaw daplin sa kalsada si Hernandez gikan sa Waterfront paingon sa usa ka grocery store sa Marina Mall diin siya magpaabot sa iyang live-in partner nga si Leah Elecion.
Base sa imbestigasyon sa Lapu-Lapu City Police Office (LLCPO) Traffic Division, ang biktima naligsan Nissan Urvan Estate van nga nagdala sa plaka nga YHW-478 nga gimaneho ni Adonis Abing, 38, ulitawo ug taga Saac I, Barangay Buaya, Lapu-Lapu.
Sigun sa mga nanggawas nga taho nga si Abing gikan naghatod sa mga flight crew sa usa ka airline company sa Mactan-Cebu International Airport Authority (MCIAA) ug giingong nakatagpilaw samtang kini nagmaneho.
Sa inpormasyon nga nakuha ni SP02 Jose Ruel Nalzaro nga samtang naglakaw lang si Hernandez nadaro ngadto sa sementado nga kalsada ang biktima ug nalatayan pa sa maong van.
Patay dihadiha si Hernandez samtang mitahan sa iyang kaugalingon ang drayber nga si Abing ngadto sa mga sakop sa airport police ug gi-turn over sa LLCPO ingon man ang pag-impound sa gimaneho niini nga van.
Ang nagbangutan nga live-in partner sa namatay nagtinguha sa pagpasaka og kaso batok ni Abing sa dihang nabiyaan ang duha nila ka mga gagmay nga anak nga nagpangidaron og tres ug dos anyos.
Usa sa mga anak nagsaulog sa adlawng natawhan niadtong Dominggo ug lain usab ang mag-birthday karong Disyembre 7.