Wa makawati tungod sa alarm system

TUNGOD sa alarm system, mga kawatan nagdinaganay pagsibat gikan sa ilang gilungkab nga usa ka estabisemento sa dakbayan sa Mandaue.

Pasado alas 8 sa buntag niadtong Dominggo, ang Yasco Motor Parts nga nahimutang sa dalan Rizal, Barangay Basak ug gipanag-iya ni Roger Uy, ang gilungkab sa mga batan-ong lalake.

Matod sa kapulisan nga ang mga sakop sa Mobile Patrol maoy nakadawat sa alarma hinungdan nga dali silang ningresponde.

Sa ilang pag-abot wa na diha ang mga kawatan apan abli na ang roll-up door sa establisemento.

Ang tag-iya nga kapin pa sa oras nga niabot sa iyang establisemento nikompirmar nga abli na gyod ang ilang tindahan sa iyang pag-abot.

Sa dihang iyang gisusi ang cash drawer, wa kini maablihi tungod kay nitingog ang ilang alarm system.

Tungod sa pagtingog, nangaratol ang mga kawatan mao nga daling nakasibat nga way nadala.

Sa dihang ilang gisusi ang gibutang nga CCTV camera, aduna gayoy nakitang mga tawo nga ningsulod sa tindahan.

Mao kini karon ang giila sa kapulisan kon si kinsa ang mao nga mga tawo.

Ang pangulo sa Theft and Robbery Section (TRS) sa Mandaue City Police Office (MCPO) nga si Insp. Ramil Morpos niingon nga ang ang gibutang nga alarm system nakapakgang sa pagpangawat.

Kini nagpakita lang nga dako og matabang ang alarm system sa higayon nga adunay dautang tawo nga mosulod sa usa ka tindahan.

Hinungdan nga nanawagan siya sa tanang mga magpapatigayon nga mobutang og mga alarm system ug mga CCTV camera sa ilang establisemento aron kapugngan ang krimen.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph