WiFi nga siyudad

MORA'G usa ka istoryang science-fiction. Huna-hunaa daw ang usa ka talan-awon diin ang mga virtual people o mora'g tawo nga ginama sa elektrisidad gisulod sa usa ka kahon ug molihok sumala sa gi-program kaniya. Tingali nakita ninyo ang salida nga "Matrix" ug "Tron" diin nisulod ang usa ka tinuod nga tawo ngadto sa "wired city" aron iyang buntugon ang mga kaaway nga buot moguba sa kalibutan. Daw wala silay kamatayon ug may talagsaong gahum. Ang baston nga puthaw mahimong hinagiban ug puwede sab mahimong big bike sa pagpindot sa buton. Makita ug mabati nila ang tawo bisan asang dapit sa kalibutan pinaagi sa ilang monitor o antipara. Ang mga computer programmers mora sab og ginoo nga mohimo og virtual world pinaagi sa gahum sa siyensya.

Sa dili madugay ang siyudad sa Davao moipon sa nagkadaghan nga nasud sa kalibutan nga "Wi-Fi (Wireless Fidelity) able." Ang atong malantip nga Konsehal Pilar C. Braga sa unang distrito nga chair sa committee on transportation and telecom sa SP nagduso og balaudnon nga mahimong Wi-Fi city ang Davao isip ayuda sa pagpalambo sa ekonomiya, sosyal ug kultura sa siyudad. Sayud kita nga kusog ang paglambo sa nasud kon ikumpara sa daghang siyudad sa Asya ilabi sa natad sa turismo, negusyo ug isip convention hub sa nasud. Dili na mawagtang ang internet ug mga information technologies sa atong kiliran busa maayo nga magamit kini alang sa kabulahanan sa mga Dabawenyo.

Wala ko kahibalo kung may siyudad na ba sa nasud nga WiFi able kay kung wala pa, hayan nga first in the Philippines na pod ni ilabi na nga gisuportahan kining maong plano ni Mayor Sara. Kung madayon, sayon na kaayo ang access sa katawhan sa libreng Wi-Fi bisan asa mang suok sa siyudad ug mominus ang gasto sa telecommunications.

Karon ang may PC, laptop, notebook, android pad, IPOD ug mga bag-ong cell phones kinahanglan nga mobayad sa Internet Service Providers. Kung wa ko masayop tag P15 ang average nga bayad matag oras sa internet cafe samtang may unlimited connection nga tag P50 sa usa ka adlaw sa broadband.

Ubos niining maong balaod, ang siyudad nay mobayad sa paggamit og Wi-Fi sa katawhan sa Davao. Daghang siyudad sa laing nasud ang naghimo na niini. Ang siyudad sa Jerusalem, Israel maoy unang may citywide Wi-Fi network sa kalibutan nga gisundan sa Mysore, India niadtong 2004. Nisunod sab sa tuig 2005 ang mga siyudad sa Sunnavale, California ug Minneapolis, USA. Niadtong Mayo 2010, si Mayor Boris Johnson sa London, UK, nagsaad nga dunay London-wide WiFi sa tuig 2012.

Ikalipay nato kining maong plano kay gawas nga maayo kini sa negusyo ug serbisyong sosyal, daghang mga kabataan nga nagtungha ang makabenepisyo niini. Ang internet, sama sa uban pang himan, makatabang kung sakto ang paggamit niini ug makadaut sab kung pasagdan lang.

Unta pakusgon sab sa gobyerno ug pribadong grupo ang kampanya nga dili maabuso ang paggamit sa internet sa pagkuyanap sa pornograpiya, trafficking, sugal ug uban pa nga makadaut sa sensiya sa maong programa.

Magpaabot mi ma'am ug sir sa katikaran niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph