Yuta nahulpa; trapik nabara

KAPIN sa usa ka oras nga nasira ang karsada human nahulpa alas 2:45 kagahapon sa hapon ang dakong bahin sa yuta kilid sa national highway sa Barangay Kawasan, lungsod sa Aloguinsan, Sugbo.

Si Sr. Insp. Jaime Tolentino, hepe sa Aloguinsan Police nga nahinabi sa Sun.Star Superbalita, niingon nga nakadawat silag tawag gikan sa usa ka concerned citizen sa dapit nga nipahibawo niini.

Matod niya nga kalit lang nihulpa ang usa ka pangpang ug nitabon sa national highway nga may gitas-on sa 10-15 ka tiil nga gilangkuban sa mga yutag bato.

Swerte kay way bisan usa ka tawo nga naangol o sakyanan nga niagi atol sa paghulpa sa yuta.

Ang contractor nga maoy naghimo sa karsada maoy daling nipabuldos sa mga yuta nga nagbabag sa dalan pinaagi sa mga heavy equipment.

Moabot sa usa ka oras ug tunga ang pagkabara sa dagan sa trapiko.

Hinuon mga alas 4 pasado sa hapon kagahapon naagian na sa pagbalik ang maong dalan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph