KASKASTREK pay laeng ni tawen-2021...aggagaburen dagiti kontrobersiya a namasungad. Umuna, di ninamnama ti ipupusay daydi nalaing a heneral ken MMDA Chairman iti agdama a ni Gen. Danilo Lim. Nasapa a simmina. Ngem iti likudanna, adu dagiti dinto kalipatan a gappuananna. Ti inkam pannakipagrikna ken kudos. Maikadua a nangmantsa iti entrada ni 2021 ket ti pagteng iti biag ti maysa a flight attendant. Piman a bangkay ti nagtinnaganna iti baet dagiti agsisimparat nga imbestigasyon ken atap kada tsismis ken sao-sao iti kanawan ken kanigid a di mayannatup. Sabagay, dipay nalpas ti imbestigasyon, pards, ta immintran ti NBI. Urayentayo laengen ti pagbanaganna. Ti inkam manen pannakipagrikna. Maikatlo a kagiddan dagiti kontrobersiya ket ti dipay nalpas a nasukainan panggep iti bakuna kadagiti miyembros ti PSG. Medyo naruroden ni Pres. Duterte ta timmapik kontra iti ikaskasa ti Senado (kano) nga imbestigasyon dita. Maysa pay a nangpagasang iti isasangbay ti 2021 ket ti agdama a gulo sadiay Estados Unidos . Kasla estilo kudeta kano ti inaramid dagiti pasurot ni Trump kontra Biden (Pres. Elect) a kasla agsubsubli manen ti riri dagiti Puraw ken Nangisit iti pakasaritaan ti Amerika. Kalaksidan kadagitoy, natural....kontrobersiya pay latta ti isyu no kaanunto a maaddaantayo iti bakuna (Covid-19 vaccine) ditoy pagilian. Sige, saggaysaentayo , pards a buksilan ken sukimaten dagita a kontrobersiya bareng makatulong ti Karit ti Sun Star iti kaadduan.
***
Gapu iti agsasarumbinit a rakurak kas kada basnot ken kutak iti pannakapapatay iti maysa a flight attendant...nag-viral manen daytoy iti sangalubongan. Natural, adu manen ti nagririnnaked iti kapapanunotan ken panirigan. Adu ti nagkuna a kasdiay ken kastoy ngem aguray kakabsat ta agim-imbestrigar pay laeng dagiti otoridad nangruna ti NBI. Adda ngamin sanga dagiti otoridad ti nagkunan a na-rape ti biktima ngem kuna met ti korte...awan met ti intudoda nga akin-aramid. Isu a dagiti tallo nga immunan a naikustodiya ket nawayawayaan. Kuddot ti Karit: apay ngamin aya a dida kumpletuen nga isalansan dagiti ebidensiya kontra kadagiti suspetsa sakbay nga ikutakda ti resulta ti addangda? Iti kastoy ngamin a proseso..kaasi met piman dagiti biktima ken maak-akusaran. Agkakawilen dagiti panagarisit ken panagtimbang. Kumarkaro met a lumidlidem ti turong dagiti imbestigasyon? Addan iti ilina ti piman a biktima a flight attendant. Ngem iti likudna, sumursurot latta dagiti pasamak a kasla agtultuloy a mangal-allia iti kinataona kasta met kadagiti suspetsa a nakaduana iti maysa a tipon-ragragsak. Arasaas daydi lolok (tagtagainep) awan turongna dagita a kasta nga innatap ken pinnirdian. Awan dumana dayta idi panawen ti Katipunan. Isu-isuda met laeng ti nagdidinnadael. Ania't napasamak? Isuda met laeng ti narsaak. Imbes a panagkaykaysa koma, saan ta gapu iti kinaadu dagiti aginlalaing...mababtuog ti aniaman a gannuat. Kararag ti Karit....sapay koma ta ti umno a hustisya para kenni flight attendant ket maipursige iti kabiitan a panawen.
***
Iti met tartaraipus ti isyu iti bakuna kadagiti kameng ti PSG a mangmangted-seguridad iti presidente...imbes nga umpes...kasla met ad-adda a lumlumteg. Tsk tsk...nakakat-katawa a gapu iti daytoy nga isyu, agriririn dagiti kangrunaan a paset ti gobyerno ti pagilian a di koma met rumbeng ta adda nagbebendenganda a legal. Nagkutak ti kongreso. Sinuplang met ti ehekutibo. Kinapudnona, nakaibbet payen ti presidente iti ballaag a no ituloy ti senado ti kunada a hearing iti bakuna dagiti taga-PSG...amangan ta dumagdagsen ti parikut. Amangan kano ta mismo a ni Pres. Digong ti personal a mapan idiay Senado a kumastigo. Haayy biag, sennaay ti kaadduan: imbes koma a ti pagsentruan ita iti atensiyon-serbisyo ti gobyerno ket panggep iti no kaanotayo a makaala iti bakuna (wenno makagatang) para iti pagilian. Adun dagiti rakurak ti DOH nga umadanin ti bakuna. Ngem dipay nasimpa no kasano ti pannakaaramat dagita a bakuna. Dayta koma ti inda sentruen a saripdaan tapno awanto manen dagiti palso wenno palpak a mapasamak. Ti ngamin banglesna, no simrek iti gartem-pulitika iti maysa a parikut wenno kontrobersiya, dumakkel ken dumagsen daytoy. Imbes a masolbar...dagiti pay basnot kada plano dagita a pulitikos ti makauna a makaala iti atensiyon. Iti bennegmi: dida koman limogan iti pulitika ti bakuna isyu dagiti PSG ta salaknib met laeng iti maysa a presidente ti inaramidda. No anianto man ti epektona dayta a bakuna kadakuada...dita a maibase dagiti napulitikaan a panirigan, saan koma pay nga ita a panawen. Salluad ti kaadduan manipud iti bakuna ti rumbeng a maitandudo a saan ketdi a salluad iti bukod a pannggep dagiti kontra a kapanunotan.
***
No panggep iti updates iti mapaspasamak sadiay Estados Unidos...kasla awan dumana, pards, kadagiti nagplano ken nangbuangay kadagiti kudeta ditoy Pilipinas. Kinapudnona, iti pannakaisursurat daytoy a panid...addan maysa a supporter ni Pres. Trump ti natay gapu iti gulo idi simrrek iti uneg ti Kapiltolyo dagiti brigada ni Trump tapno mapasardengda ti agtultuloy a kumpirmasyon iti kina-presidente ni Biden. Iti benneg ni Trump, sinaurda kano daytoy iti napalabas nga aleksiyon isu a naabak. He he...kas nakunamin, awan dumana dayta ditoy pagiliantayo, saan aya? Ngem iti dumana, adda dagiti korte a nakaisaklangan dagita a protesta a saan ketdi nga kadagiti addang akas inaramid dagiti supporters ni Trump. No lagip ti intay pagibasaran, adda pay laeng iti agdama kadagiti maseknan a korte ti impila ni Bongbong Marcos kontra VP Leni Robredo a reklamo kontra (kano) iti alegasyon nga adda napasamak a maikaniwas iti electoral process ti pagilian idi eleksiyon. No kasta koma ti pagteng met sadiay Estados Unidos...nataltalna nga awan gusot, saan aya? Isu nga iti agdama..isuda ita (US) ti sentro ti saritaan ti entero a lubong. Umuna a pasamak daytoy isu nga adu dagiti addaan danag nga amangan kano ta mabiag manen ti sigalot ken tensiyon iti nagbaetan dagiti White ken Black Americans a nabayagen a naresolba. Awan dumana dayta iti mapaspasmak pay laeng ditoy Pilipinas nga adda pay laeng ti parikut iti nagbaetan ti gobyerno ken kadagiti separatist (lumaud) ken terrorismo. Tsk tsk...nia metten ti mapaspasamak...iti tengnga ti pandemya, apay aya a ditay agsimpa a sumaranget koma iti Covid-19 virus imbes nga agririri kada agsusubang?
***
Sabagay...no intay lukiben ti pakasaritaan ti lubong ken nakaparsua-an...idi pay laeng nagkauna a panawen, napaspasamaken dagiti paspasamak iti agdama. Uray idi panawen ni Moses...a sakbay a naipaima kenkuna ti sangapulo nga annuroten nga inyurit iti baton ti Apo a Mannakabalin....adun dagiti samben ken riper a napasamak. Ngem amin dagiti kimmarit iti kapanunotan ken pagayatan ti Apo...napunasda amin. Ket rimmusing ti baro a kaputotan . Iti sakitna...daytoy baro ita a kaputotan...kasla masirsirmatatayo manen ti baro a delubyo gapu iti daytoy baro a puli. Kasla maliplipatantayon ti adal a naibati tapno intay taluntonen. Sagabay, saan pay a naudi ti amin tapno masiriptayo ti umno a dalan. Kararag ti karit iti daytoy a tawen - 2021...tibker ti panagkaykaysa ti sammaked ken puonan ti umay a masakbayan. Amen. Adios mi amor, ciao, mabalos.