AMA a mannakabalin...pakawanem ida ta ammoda ti sasawenda! Kasla bimtak nga ubet ti kamote ti nakaam-amak nga eksena itay nabiit sadiay Kabisayaan. Agasem ket kayatdan a “papatayen” ni President Duterte.
Maryusep a babassit ken dadakkel! Ta nangal-alaanda ti pigsa ti pakinakemda a mangidir-i a rumbeng a mapapatay ti presidente?
Ti eksakto a bir-itda ket: “Kill this President.” Numan pay saanda nga innaganan ni Apo Digong...kaawatan nga isu. Ngem kasano aya a napasamak daytoy, pards?
Ala, sakbay nga intay sungbatan dayta a saludsod agraman impasngayna a reaksiyones...intay man biit lagipen dagiti sumangka-kontrobersiya met a pagteng iti napalabas:
***
Iti maikapat a daras...nagpa-Japan ni President Duterte itay nabiit tapno saksian ti enthronement wenno pannakaipatugaw ni Japanese Emperor Naruhito.
Ngem saanna a napalpas ti tallo nga aldawna koma sadiay gapu iti panagsakit ti bukotna. Nagsublin a sigida ti bassit a grupo ti presidente ditoy pagilian ket kalpasan iti pannakaeksamen kenkuana dagiti doctor...naammuan nga addaan daytoy iti muscle spasm.
Kunada, saan kano met a delikado ti nasao a sakit a mabalin a bunga kano ti pannaka-aksidentena iti motorsiklo itay kallabes sakbay a nagpa-Japan.
Kas gagangay...no adda sakit ti maysa a president...agsasamusam manen dagiti panirigan kaskada suspetsa. Kannawidan nga eksena ket mapadakkel ti isyu ken paruaren dagiti kontra a delekadon ti sakit ti presidente.
Ngem nalawag ti kinuna ni Senator Bong Go (kaduana idiay Japan) nga awan rumbeng a pagdanagan iti sakit ti presidente agsipud ta “muscle spasm” laeng daytoy ket kasapulanna ti naan-anay nga inana, “Nakita nila purely muscle spasms at yung gamot na ibinigay sa kanya para du’n sa muscle spasm. May mga medisina na dapat at kailangan po magpahinga ang Pangulo. He was advised to rest, rest, rest. Ako na po ang tumitiyak na sa inyo na wala kayong dapat ipag-alala at kailangan lang ng konting pahinga ng Pangulo. Tiningnan ng doctor ang spine kung may naipit na ugat, pero wala naman po.”
***
Ni-recall ti NCRPO (National Capital Region Police Office) dagiti pulisda nga imposteda idiay Bilibid itay nabiit. Ti makagapu: smuggling kadagiti kontrabando idiay maximum prison cell ti NBP (New Bilibid Prison).
Sus maryusep! Saan aya a gapu ta adda aramiden ti Bucor babaen kenni baro a Bucor (Bureau of Corrections) Chief Gerald Bantag a demolasyon kadagiti illegal a “kubol” dagiti preso... impatulod ni sigud nga NCRPO Director Police Major General Guillermo Eleazar dagiti sumagmamano a pulisna idiay Bilibid.
Ngem banglesna, naduptalanda idi maisaang dagitoy iti pannakapkap...nga adda imet a kontrabando dagiti sangpulo ket ennem a pulis. Maibilang kadagiti illegal nga inserrek dagiti pulis-NCRPO ket tabako, arak, ken cellphone.
Kuna ni NCRPO Director Brigadier General Debold Sinas a pagsaritaanda kano kenni Bucor Chief Bantag ti nakuna a banag idinto ta naka-floating status itan dagiti 16 a pulis bayat a maim-imbestigaran ti kasoda.
No mapaneknekan a guilty dagitoy, sanguenda ti kaso a grave misconduct.
Tsk tsk...imbes a tumulongda a mangdalus iti Bilibid, isuda pay ti nagpanggep nga agipuslit iti kontrabando para kadagiti preso ti maximum prison cell?
Saludsod: kasano ngata ti kadakkel a kuarta ti naibayad kadagitoy manipud kadagiti kumbiktado ti Bilibid? No sibibiag la koma daydi lolok: maymaysa siguro ti bir-itna: “firing squad.”
Ngamin idi panawen daydi lolok...uso ti firing squad a kas pannusa dagiti kastila a maduptalan a lumablaban kadakuada. Maysa ditan daydi Dr. Jose Rizal ken dadduma pay.
Sayang ta awanen dayta a pannusa iti agdama. Ngem no ni lolok ti matungpal...mayat kano no adda. Piman ti kapulisan, pards.
Kakaasida a mangdaldalus iti ranggoda iti likud dagiti aramid ti sumagmamano a nakadadaelan ti imaheda... ngem adda met latta dagiti kiteb nga agtultuloy nga agar-aramid iti maikaniwas.
Arasaas: dagsenanyo pay koma ti dusa dagiti kiteb nga otoridad bareng ta pudno a madalusanyo ti sibubukel a PNP (Philippine National Police).
Dayta ti dakkel a karitto iti sumaganad a PNP Chief nga ipatugaw ni President Duterte a mangsukat iti naglusulos a ni General Albayalde.
***
Albayalde... kinasuanen ti PNP-CIDG (Criminal Investigation and Detection Group) iti saklang ti DOJ (Department of Justice) gapu iti isyu ti ninja cops.
Ngem sakbay daytoy, inikkaten ni PNP-OIC (officer-in-charge) Chief Police Lieutenant General Archie Gamboa dagiti tallo a ninja cops a da Police Master Sergeant Donald Roque, Police Master Sergeant Rommel Vital ken Police Corporal Romeo Guerrero Jr.
Dagitoy a puppulis ket sigud a karaman kadagiti ninja cops sadiay Mexico,Pampanga a nai-transfer idiay Antipolo ngem imbes nga agbaliw nabukoda manen nga agre-recyle iti droga a para ibedensiya koma.
Maibilang kadagiti kaso nga inlatag ti CIDG idiay DOJ kada Albayalde ken ninja cops kas iti panaglabsing iti Anti-Graft Law, perjury ken violation of section 92 of the Comprehensive Dangerous Drugs Act for Delay and Bungling in the Prosecution of Drug Cases.
Iti met benneg ni Albayalde, ti pannakaikasona ket agsirbi a kas dalan tapno mailawlawagna ti bennegna a saan laeng kano nga iti court of public opinion ti pakahushusgaanna.
No kano, sakbay iti nailatang a panagretirona koma inton Nobyembre 8 ket maduptalan ti kinadagsen ti kasona, amangan ta saanna kanon maala pay ti pensiyonna. Ngem kuna met dagiti dadduma...awan kano met ti konkreto nga ibedensiya a mangimameg kenkuana panggep iti nasapamak a raid idi 2013 sadiay Pampanga.
Sadino man ti paginggaan ti nakuna a kaso...dinto maikkaten iti utek dagiti umili ti saludsod nga: kadagiti naglabas wenno nagretiron a nangidaulo iti kapulisan...awan ngata met ti mantsada a kas iti naipabasol a mantsa kenni Albayalde?
***
Subliantayon ti “Kill this President” issue, pards.
Daytoy ket napasamak itay kallabes sadiay University of the Philippines (UP) Visayas babaen iti maysa a grupo dagiti estudyante a maaw-awagan iti “Skimmers.”
Iti salaysay ti UP-Visayas, tinawen a maisaysayangkat ti programada a “cheering competition.” Daytoy a tradisyon ket kannawidanen a buklen dagiti satirical commentaries ken komento kadagiti national ken local issues.
Iti nakuna a programa ti UP-Visayas, karaman iti natalantan nga isyu ket iti press freedom, territorial issues, rice tarification law, pannakaikkat ti Filipino iti curriculum ti kolehiyo, ROTC, Sogie,
Equality ken Divorce Bill.
Kuna met ti Malakanyang, kalpasan a pimmutok ti isyu ti “Kill This President” a siwaya-waya ti siasinoman nga “agangaw” partikular kenni Presidente Duterte.
“It’s a free country, they can dish out jokes, criticisms,” panangilawlawag ni Presidential Spokesman Salvador Panelo.
Amangan kano ta kayat laeng dagita nga estudyante ti kina-managangaw ni President Digong. Gapu iti kinadagsen ti kinuna ti “Skimmers” adu a mangisaksakit kenni President Duterte ti bimmanat a nagameranen iti sakit ti nakem. Natural reaction laeng dayta, kuna met ni Panelo a kas panangidepensada kenni President Duterte.
“Siyempre, natural lang iyon na mag-react siyempre, kasi ang dating sa kanila baka hindi sila nagbibiro, baka kunwari nagbibiro pero, talagang binabanatan nila si Presidente. That’s very natural reaction for supporters of the president,” innayon a mensahe ni Panelo.
Kuna met dagiti analysts: pudno nga addaantayo iti wayawaya nga agsao... ngem masapul nga intay met koma tangen iti kaibatogan ti tunggal balikas nangruna no dagiti nangangato nga opisyales ti gobyerno ti pakaituronganna. Masapul ti respeto aniaman ti kinatao ti kasangsangom.
Respeto wenno panagraem ti kapatgan a desdes para iti pagkikinnawatan, panagkaykaysa ken natibtibker a pondasyon ti masakbayan. Adios mi amor, ciao, mabalos!