Aron masulbad ang nagkadaghang populasyon sa mga estudyante ug mapugngan ang kakuwang sa mga magtutudlo, ang Department of Education (DepEd) Mandaue City Division bag-o lang nga nidugang og 30 ka bag-ong mga magtutudlo.
Matod ni Mandaue Division Superintendent Bianito Dagatan nga kini kabahin sa ilang padayong paningkamot sa pagsugat sa panginahanglanon sa edukasyon sa siyudad, hilabi na nga adunay natala nga 60,000 ka enrollees alang sa School Year 2025–2026.
Ang mga bag-ong nadawat idugang sa kapin sa 1,000 ka kasamtangang mga magtutudlo sa pampublikong eskwelahan nga nagserbisyo karon sa nagkalainlaing mga tunghaan sa tibuok Mandaue.
Sa tibuok nasod, adunay 16,000 nga kakuwang sa mga magtutudlo , ug ang schools division sa Mandaue naningkamot nga mapun-an ug masiguro nga ang matag classroom adunay kwalipikadong magtutudlo.
Gibutyag sa mga opisyal sa DepEd Mandaue nga ang pagkuha og magtutudlo nagpabilin nga prayoridad, hilabi na tungod sa makanunayong pagsaka sa enrollees matag tuig.
Sa pagkakaron, adunay natala nga 60,000 ka enrollees sa Mandaue. / CAV