Duna koy amigo nga nangutana og husto ba ang iyang desisyon nga mosulay sa politika ug samtang nangutana niini, nakita nako nga seryuso ang iyang panagway, daw dugay na kini niya nga gihuna-huna.
Kay seryuso man siya, seryuso sab ang akong tubag pinaagi sa mga pangutana.
Andam ba ang imong kwarta alang sa kampanya hangtod sa adlaw sa piniliay, nitubag siya og andam.
Andam ba ka nga kanang imong kwarta nga pinasingutan nga dugay na nimo gitigom iwaldas lang na nimo sa mga tawo, kaila o dili, kasaligan o dili, aron lang suportaan ka nila, nitubag siya og andam.
Andam ba ka nga ukayon ang imong kinabuhi, apil ang imong pamilya, lakip ang imong professional ug personal nga kinabuhi, apil na niini ang peke nga mga isyo batok kanimo, ang iyang tubag, andam ko.
Andam ba ka nga mogahin sa imong oras ug panahon aron atimanon ang imong trabaho sa bisan asa nga lugar ug oras, apil na niini ang pag-representar sa mga kalihukan sa imong mga bossing sa politika, ang iyang tubag kay andam gihapon.
Nangutana ko niya og unsa man ang imong plano nga trabaho sa politika, legislation o executive? Naglibog siya kon unsa ang iyang itubag ug nangayo siya og gamay nga katin-awan.
Kon nagplano ka nga ikaw maoy boss sa imong lugar, nga kanang imong gusto buhaton mabuhat nimo, mas maayo kon mag executive ka, mayor ba o gobernador. Dako ka og magasto kay one-on-one man ni nga piniliay pero dunay posibilidad nga mabawi ra nimo ang imong gasto, maoy akong pasabot.
Kon nagplano ka nga maghimo og mga balaudnon aron magamit nimo ang imong professional nga kahibalo, apil na niini ang imong gusto nga mga reporma sa natad sa lokal nga pangagamhanan, mas maayo kon mag-kagawad o mag-bokal lang ka. Gamay-gamay lang ang imong magasto kay daghan man mo nga pilian pero gamay ra ang posibilidad nga mabawi nimo ang imong gasto sa kampanya, dugang nakong pasabot.
Midugang ko nga bisan asa niini nga posisyon ang iyang lansaran, sundon gihapon siya sa wala ug tuo nga intriga, apil na ang sakop sa iyang pamilya, ug kinahanglan nga andam siya mopakaon, mopainom og mo-smile sa mga tawo nga dili niya kaila.
Kinahanglan nga andam sab siya motubag sa mga panginahanglan sa mga tawo sama sa bunyag, pista, miss-miss, namatyan, kasal, naka-buntis, na-ospital, nakaligis, naka-kulata o nakulatahan ba kaha, mohusay kon dunay nag-away o dunay hubog nga nag-maoy, magtiayon nga nag-away, nasunogan, naligsan, nadakpan sa polis ug bisan unsa na lang nga problema sa mga tawo – human makadungog niini, dugay nga naghinuktok ang akong amigo.
Nakasabot ra sab ko nga nakurat siya kay wala siya magtuo nga ingon ana diay kamaot ang dagway sa politika sa atong nasod.
Nagtuo siya nga kon mag-politiko siya, igo ra nga pa-cute-cute kon ting-session o ting-opisina, sul-ob og nindot nga sinina unya pustorawo pirmi sa mga picture-picture, air-conditioned nga opisina, nindot nga sakyanan plus driver unya libre ang krudo o gasolina, dunay daghan staff nga modala sa iyang mga gamit ug motuman sa iyang mga sugo, tawgon og “honorable.”
Hatagan og maayong pagtagad ug abi-abihon sa tanang mga kalihukan sa lungsod o probinsiya, libre nga biyahe sa ubang lugar apil na sa gawas sa nasod ug magdawat pa gyod og dakong sweldo matag bulan, plus allowance.
Human makadungog sa akong pagpasabot, dugay siya nahilom ug misulti nga magkita mi og usab karong Biyernes puhon. Unsa kaha ang iyang desisyon noh?