HULYO 7. 2001, tulo ka mga adlaw sa wa pa ang iyang ika-12 nga sumad sa adlaw nga natawhan. Nanglimpyo si Mae sa ikaduhang andana sa balay ni Rudy, bana sa iyang iyaan. Ang akusado maoy nisugo kaniya.
Samtang siya namutang og floorwax, kalit nga nisud si Rudy ug giduot siya ngadto sa sawog ug gihuboan. Nisukol siya pinaagi sa pagsukmag sa dughan sa akusado ug nangayog panabang.
Apan pakyas siya kay gipatungan siya ni Rudy ug gipabilangkad, gikuptan ang iyang mga kamot. Gihubo sab sa akusado ang iyang short pants dayon giangkon ang iyang pagkababaye.
Di kadto maoy una ug katapusan. Nianang Hulyo 19 sa samang tuig, didto sila si Mae ug ang iyang inahan sa balay ni Rudy kay niabot si Lenlen, iyang iyaan, gikan sa abroad. Kay kaihion, nangita siyag kapasalipdan mga 30 metros gikan sa balay sa iyang iyaan. Sa kalit lang, nitunga si Rudy ug gibitad siya sa balay nga padayon pang gitukod.
Bisan sa iyang paglugnot ug pagsinggit, naangkon na sab sa iyang uyoan ang iyang pagkababaye. Gipahimangnoan siya nga di mosulti. Apan nakakita kaniya ang iyang iyaan nga didto siya sa balay nga gitukod pa. Didto na siya nitug-an sa iyang kasinatian.
Apan si Rudy nangitag lusot. Matod niya nga sa Hulyo 7, siya sa ilang umahan mga usa ka kilometro ang gilay-on gikan sa ilang balay aron maoy magdumala sa pagpananom og humay sa ilang basakan. Didto siya hangtod nianang udto. Human niini iyang gihapit ang iyang anak ug nipauli mga alas 12:45 sa udto.
Matod niya nga sa Hulyo 19, daghan kaayo silag bisita. Mga alas 5 pa lang sa hapon, nagsugod na sila sa pag-andam sa pagkaon hangtod sa mga alas 8 pasado sa gabii. Busa imposible kaayong mahitabo ang pagpanglugos.
Katuohan siya o di? Kon ikaw ang pahukmon, sad-an ba siya sa duha ka mga kasong rape?
Hukom sa kasong rape
Napalgang sad-an ang akusado sa paglugos sa iyang anak. Sa duha ka mga kasong qualified rape, gisilutan siyag reclusion perpetua nga way parole.