Sa iyang gitas-on nga 7-foot-4 ug istilo sa dinuwaan, ang rookie nga si Victor Wembanyama maoy usa sa mga giatangan sa umaabot nga National Basketball Association (NBA) regular season nga sudgan karong Oktubre 24.
Mipakita og preview si Wembanyama sa mga fans kon unsa ang kaya niining buhaton ubos sa San Antonio Spurs sa ilang pagpakgang sa Miami Heat, 120-104, sa NBA preseason sa Sabado, Oktubre 14 (RP time) atubangan mismo sa liboan ka fans sa Frost Bank Center, San Antonio, Texas.
Ang first overall pick sa 2023 Rookie Draft nga lumad nga taga France midominar sa duwa pinaagi sa iyang 23 puntos sulod sa 23 minutos nga playing time. Midugang pud kini og upat ka rebounds, upat ka assists ug tulo ka blocks.
Napasulod ni Wembanyama ang 10 sa iyang 15 ka itsa ug ang duha ka free throws aron langkaton ang kadaugan sa iyang ikaduhang preseason game human ang masakit nga 122-121 nga kapildehan batok Oklahoma City niadtong Lunes.
Si Devin Vassell nakahimo og 21 puntos gikan sa 6-of-7 shooting sa three-point area ug aduna pud kini tulo ka assists aron tabangan si Wembanyama ug ang Spurs sa kadaogan.
Mitampo og 10 puntos, unom ka rebounds ug tulo ka assists si Jeremy Sochan.
Samtang si Jamal Cain maoy pinaka-asintado nga player alang sa Heat kay nakahimo man kini og pasulod sa unom sa iyang walo ka tira sa three-point area ug mitapos sa duwa nga adunay double-double nga 24 puntos ug 10 ka rebounds.
Ang shooter nga si Duncan Robinson mitunol og 14 puntos ug lima ka assists alang sa Heat.
Si Jaime Jaquez Jr., ang 18th overall selection karong tuiga, wala moduwa human nakahimo og 13 puntos aron tabangan ang Miami batok Charlotte Hornets niadtong Oktubre 11.