Gipasalig sa Philippine National Police (PNP) nga ilang palig-unon ang mga lakang sa pagpanubag tali sa mga polis nga mapugngan ang mga kabataan ug ang uban nga dili awtorisadong nga makaakses sa mga service firearm.
Gimando ni PNP Chief Gen. Jose Melencio Nartatez Jr. ang mga hepe sa kapulisan sa tibuok nasod nga pahinumdoman ang tanang police personnel sa hustong paghipos ug pagdumala sa ilang mga armas, ilabina kon wala sila sa duty ug anaa sa ilang mga panimalay.
“Firearms must never be left in places where children or unauthorized persons can gain access to them,” matud ni Nartatez.
Ang maong direktiba subay sa mando ni Presidente Ferdinand R. Marcos Jr. nga palig-unon ang kaluwasan sa publiko ug maseguro nga ang mga kawani sa gobiyerno magpakita ug responsable nga pagdumala ug paghipos sa ilang mga armas.
Gimando sab ni Nartatez ang mga police commander nga magpahigayon og kanunay nga mga pahinumdom kabahin sa responsibilidad sa pagkupot ug hipos sa ilang mga armas atol sa mga briefing ug formation sa ilang mga yunit.
Bag-ohay lang nahitabo ang mga pagpamusil sa mga eskwelahan nga naglambigit sa mga armas nga giisyu sa mga kawani sa gobiyerno sa Ateneo de Zamboanga University Junior High School ug San Jose National High School sa Tacloban City, Leyte.
“Here in the PNP, we will continue to remind our personnel that owning or carrying a firearm comes with a serious responsibility. One moment of negligence can result in the loss of life. We support calls for stricter accountability among gun owners. Responsible storage is non-negotiable,” dugang pa ni Nartatez. / PNA
