Makigbatok ang Gilas Pilipinas sa Macau Black Bears karong Hulyo 28, 2025, sa Smart-Araneta Coliseum sa usa ka tune-up game.
Mao kini ang pahibalo sa Samahang Basketbol ng Pilipinas (SBP), nga maoy basketball organizing body sa Pilipinas.
Magsilbe kining send-off game sa Gilas alang sa kampanya niini sa FIBA Asia Cup 2025 nga ipahigayon karong Agusto sa Jeddah, Saudi Arabia.
Sukad nga si coach Tim Cone na maoy head coach sa Gilas, ang national team mopahigayon na gyud og send-off games sa dili pa kini mohamag sa usa ka mayorihiyang kompetisyon.
Sa niagi, ang Gilas ningmakmak sa Taiwan Mustangs, 74-64, niadtong Hunyo 24, 2024 tune-up sa Philsports Arena una kini ninglarga paingon sa Europe aron mangandam alang sa FIBA Olympic Qualifying Tournament.
Niadtong Septiyembre 22, 2023, gipangpukan sa Gilas ang Changwon LG Sakers, 86-81, sa Philsports Arena una kini ningbiyahe paingon sa Hangzhou, China alang sa 19th Asian Games.
Sa Fiba Asia Cup, ang Gilas makigbatok sa Chinese Taipei karong Agusto 6, New Zealand karong Agusto 8, ug Iraq karong Agusto 10 sa group stage. / ESL