ONSE ka mga tawo ang nasikop human gironda sa mga sakop sa Mabolo Police Station ang usa ka tigbakayan sa Sitio Upper Carreta, Barangay Carreta sa dakbayan sa Sugbo alas 4:30 sa Dominggo sa hapon, Agosto 11, 2024.
Ang mga nadakpan giila nga silang alyas Dante, 54, taga Gil Tudtud, Mabolo; Marlon, 22, taga Sitio Rail Site, Barangay Hipodromo; Alan, 52, taga Carreta; John, 20, taga Sitio Riverside, Hipodromo; Jerson, 38, taga Sitio Sta. Cruz, Guizo Mandaue City; Jungie, 41, taga Hipodromo; Lolito, 47, Carreta; Alfie, 32, Hipodromo; Erwin, 28, taga Sitio Lahing-lahing, Mabolo; Victoriano, 45, taga Carreta ug Abraham, 28, taga Sitio Estasyonan, Mabolo.
Matod ni Police Major Romeo Caacoy, hepe sa Mabolo police station nga gi-roving sa kapulisan ang dapit ug ilang naabtan ang mga nagtigbakay nga gibana-bana nga moabot sa usa ka gatus ka mga tawo.
Apan dihang gironda, onse lang ka mga indibiduwal ang nadakpan.
Nakuha ang usa ka patay na nga manok igtatari ug mga buwang nga nabilin atol sa pag dinaganay.
Ang mga suspetsado pasakaan og kasong may kalapasan sa illegal gambling karong Lunes, Agosto 12. (AYB)