Nadakpan pinagi sa hot pursuit ang 17 anyos nga ulitawo human nga gipasanginlan nga milugos sa 13 anyos nga tinun-an sa Grade 6.
Base sa imbestigasyon nga niadtong Martes sa gabii, Septiyembre 3 nahitabo ang matod pang pagpanglugos sa Purok Rose, Sityo Visayan, Barangay Lana, Naga City, Cebu.
Giingon nga gitawag ang biktima sa maong suspek, sa dihang miduol ang bata gibunlot kini ug gidala sa mingaw nga lugar ug didto giamong-amongan.
Misumbong ang biktima ngadto sa iyang amahan nga maoy nangayo og tabang sa kapulisan ug nadakpan ang 17 anyos nga suspek, Huwebes sa buntag, Septiyembre 4. / DVG