2 nakaplagan nga patay na

BIKTIMA: Kini ang biktima sa pagpamusil sa Sityo Ilag, Barangay Cantabaco, Syudad sa Toledo.
BIKTIMA: Kini ang biktima sa pagpamusil sa Sityo Ilag, Barangay Cantabaco, Syudad sa Toledo.Tampo nga hulagway

Usa ka lalaki ug usa ka babaye nakaplaga’ng pulos patay na sa managlahing dapit sa lalawigan sa Sugbo.

Alas 5:35 sa hapon sa Do­minggo, Hulyo 7, 2024, usa ka lalaki ang nakaplagan nga patay ug dunay pinusilan, ang nalup-og sa dan sa Sityo Ilag, Barangay Cantabaco, Siyudad sa Toledo.

Ang maong lalaki giila sa kapulisan nga alyas Chokloy.

Usa ka drayber sa habal-habal ang niadto sa Toledo City Police Station ug nagpahibalo bahin sa iyang nakita nga patay nga tawo.

Ang kapulisan ubos sa kamandoan sa ilang hepe nga si P/Lt. Col. Manolo F Salvatiera nitubag sa alarma uban sa mga sakop sa Scene of the Crime Operation (Soco).

Ang biktima nga si alyas Chokloy, hamtong ang panuigon, minyo, ug taga Sit­yo Bawod, Brgy. Magdugo sa dakbayan sa Toledo.

Sa pasiunang imbestigasyon sa kapulisan nasuta nga ang biktima gikan sa buwangan nga nagmotorsiklo nga gituohan nga mopauli na apan pag-abot sa maong dapit, gibanhigan.

Nakuha sa bulsa sa biktima ang kuwarta nga P7,500 hinungdan sa pagduda na dili tulis ang motibo sa pagpatay.

Padayon pa ang imbestigasyon sa kapulisan sa Toledo sa maong kaso atol ning pagsuwat.

Sa laing bahin, lawas sa usa ka babaye ang napalgan gumikan sa tabang sa GPS tracking sa cellphone sa baybayon sa Purok 2, Sityo Santa Cruz, Brgy. Tubigagmanok, lungsod sa Asturias, alas 8:30, Sabado, Hulyo 6, 2024.

Ang maong babaye giila nga si "Joan", 33, dalaga apan may kapuyo nga taga Sityo Bung-aw, Brgy. Pondol, lungsod sa Balamban.

Base sa imbestigasyon sa kapulisan sa Asturias nga gipangulohan sa ilang hepe P/Maj. Alden B. Zambrano, nasayran pinaagi sa asoy sa kapuyo sa maong babaye nga nakasinati kini og depression.

Dugang sa kapuyo, kalit nga nikunhod ang timbang niini ug nakapalta sa trabaho dihang nalandig kini ka duha ka higayon sa Balamban District Hospital.

Matod pa nga alas 8 sa buntag sa naasoy nga adlaw, nibiya kini sa ilang balay ug iya kining gipangita pinaagi sa GPS locator sa cellular phone hinungdan nga nasubay kini.

Gidudahan nga nalumos kini.

Ang maong babaye gidala sa mga sakop sa rescuers sa Asturias ngadto sa klinika sa lungsod apan gideklarar nga dead on arrival sa attending physician nga si Tiffany Jane Codilla.

Ang pamilya sa namatay gitambagan sa kapulisan nga ipa-autopsy ang patay nga lawas niini aron masuta ang iyang kamatayon. (DVG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph