Pagkabulahan sa katawhan gigasahan
Sa kahitas-an og maayong panahon
Nunot sa kinaiya sa tawo adunay dautan,
Adunay maayo.
Sanglit gasa man kini sa kahitas-an
Dawaton, hangpon ug angay kini
Ampingan. Kining tanan sa kalibutan
Lumalabay ug bililhon dungan
Sa pag irog sa takna.
Ug sa kalit lamang nausab
Ang panahon. Mikisdom ang langit
Milanog ang makusog nga tingog
Sa dalugdog, mikiblat ang kilat,
Mibundak ang kusog nga ulan,
Mihuros ang kusog nga hangin
Ug mingitngit ang lukop kalibutan.
Midanguyngoy ang katawhan sa kalisang
Dulot sa kasingkasing ang pag-ampo
Ug pangaliyupo: Maayong panahon
Ibalik pag-usab maoy gihangyo.
Hinay-hinayng miukab ang mga baba
Misinggit sa makusog ug nanumpa
Maayong mga gawi maoy sundon
Ug ang maayong mga buhat maoy
Tumanon. Sanglit dili pa ulahi ang tanan
Sanglit aduna pay mga kahigayunan,
Panikaysikay na karon kay kon moabot
Ang gitakdang higayon nga hagip-ot na
Unya ang oras, wala ka nay panahon.