Barrita: Climate change, pagbalik sa karaan nga school calendar

Tikdul-tikdol
Tikdul-tikdol

Ang karaan ug naandan nga school calendar sa elementarya ug sa high school mao ang Hunyo hangtod sa Marso. Bakasyon sa Abril ug Mayo.

Apan atol sa pandemic gibal­hin kini ngadto sa Septiyembre hangtod sa Marso. Ang nag-u­nang katarungan mao nga lika­yan ang tingbagyo, ting-uwan ug tingbaha.

Sa 2014, gibasura ni kanhi Education Secretary Armin Luistro ang pag-usab sa school calendar sa upat ka katarungan. Una, managlahi ang pagbukas sa klase sa mga nasod sa Association of Southeast Asian Nations (Asean). Ikaduha, di magbalhin-balhin og eskuyla sa laing nasod. Ikatulo, di kini makasulbad sa bagyo ug baha. Ug ika-upat, dunay negatibong epekto sa mga estudyante ang sobrang kainit.

Sa dihang giusab ang school calendar, nigawas ang mga taho nga daghang mga estudyante ang nakuyapan tu­ngod sa sobrang kainit. Apan tungod kay niagi ki­ta sa pandemya, gisagop ang hy­brid ug online clas­ses. Alkanse ang way Internet.

○ ○ ○

Dako og epekto sa edukasyon ang kausaban sa panahon. Di na bag-o ang pag-uwan ug pagbaha atol sa tingklase. Didto sa Cabadiangan, tabukon og sapa ang among eskuylahan sa elementarya. Kon magbaha gani, mosakay mi og kabaw aron makatabok sa baha.

Ang kabaw maayong molangoy ug mo­sungasong sa baha. Maayo na sa panahon sa adlawan. Kon hapon na, maghuwat mi nga mokutat ang baha.

Apan kinahanglan gihapon nga mag-am­ping kay ang baha ma­kahimo usahay og mga lim-aw ug delikado nga matislaob ka.

Di kaayo ni problema dinhi sa syudad sa Sugbo kay dali ra mang mohubas ang baha. Tingali didto sa mga bukirang bahin sa syudad ug sa susamang mga lugar sa lalawigan sa Sugbo nga tabukunon og sapa ang mga eskuylahan.

○ ○ ○

Gipaabot nga ibalik ang kara­ang school calendar karong tuiga. Busa, buksan ang klase sa Hunyo. Wa pa kini kompirmaha sa Department of Education (DepEd). Apan duha ka mga pundok sa mga magtutudlo miingon nga mao kini ang ilang nasabutan sa mga opisyal sa edukasyon niadtong Enero 16.

Angay kining tan-awon sa kadagkuan sa DepEd. Sa mga slogan pa sa mga kandidato atol sa kampanya, “kausaban alang sa kalamboan.” Panahon na nga repasuhon kon duna bay kalamboan nga nahitabo sa pag-usab sa school calendar.

Ang kamatuoran mao nga angay gyud nga iapil sa pagplano sa mga opisyal sa edukasyon ang climate change.

Ug angay nga morekomendar sila nga butangan og tulay kadtong dunay mga sapa. Syaro sab sa atong mga politiko, mosaad man gani ang uban nga tukoran ang mga tawo og tulay bisan way sapa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph