‘Giatake’ samtang nag-drive, namatay

AKSIDENTE: Mao kini ang awto nga gimaneho ni Gumora Villamor Lao, 77, nga nahulog sa mabaw nga kimba sa lungsod sa Asturias niadtong Dominggo sa gabii.
AKSIDENTE: Mao kini ang awto nga gimaneho ni Gumora Villamor Lao, 77, nga nahulog sa mabaw nga kimba sa lungsod sa Asturias niadtong Dominggo sa gabii.Tampo nga hulagway

Namatay ang usa ka 77-anyos nga lola nga nag-inusara samtang nagmaniho sa iyang awto nga nahulog sa kimba sa alas 6:35 sa gabii sa Dominggo, Disyembre 17, 2023 sa national highway sa Brgy. Langub, Asturias sa tunga-tungang kasadpan sa Sugbo.

Gituohan nga giatake sa sakit si Gumora Villamor Lao, taga Brgy. Sabang, siyudad sa Danao, amihanang Sugbo.

Apan gitataw ni Police

Capt. Marlon Adao, hepe sa kapulisan sa Asturias nga nahinabi sa Superbalita Cebu pinaagi sa telepuno sa Lunes, Disyembre 18, nga ila ra kini nga pagtuo base sa ilang nakita sa dapit nga nahitaboan.

Matod ni Adao nga gikan sa Danao ang biktima nga mopaingon sa Balamban, Sugbo.

Matod ni Adao nga iyang gidudahan nga giatake sa balatian si Lao nga niresulta sa pagkahagbong sa awto sa kimba nga dunay mga tres metros ra ang giladmon.

Matod niya nga ilang nasuta sud sa awto nga may mga tambal nga dala ang biktima ug way samad o bun-og sa ilang pasiunang paghiling.

Si Adao nagkanayon nga iya pang istoryahon ang pamilya aron mahibaw-an kon unsay balatian niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph