Nagtingkagol karon sa prisohan ang usa ka 43 anyos nga lalaki kinsa giingong nanumbag ug nanuok nunot sa kahubog alas 7:30 Dominggo sa gabii, Agosto 25, 2024 sa Purok Mankikis, Barangay Tangke sa Dakbayan sa Naga.
Nailhan ang dinakpan nga si Joseph.
Nadakpan siya human nanawag ang usa ka empleyado sa Naga City Disaster Risk Reduction Management Office (CDRRMO) ngadto sa kapulisan ug nipahibawo sa maong kagubot.
Pag-abot sa lugar, naabtan sa kapulisan nga gituok ug gikulata na sa suspek ang 19 anyos nga biktima nga si Alfart.
Human sa insidente, gidakop ang suspek samtang daling gi-atiman sa mga sakop sa Naga CDRRRMO ang biktima human nga naangol kini.
Sa imbestigasyon sa kapulisan, naglakaw ra ang biktima paingon sa usa ka tindahan apan kalit lang nga nitunga ang suspek nga gituohang hubog og dayong ni hamag sa biktima.
Gikataho nga way igong rason ang suspek kon nganong iyang gituok ug gikulata ang biktima. (DVG)