Maghimo na sab og langas ang lungsod sa Moalboal, Cebu kabahin sa paugnat sa kusog sa ilang gipasiugdahang 2nd Mayor Inocentes Cabaron Invitational Intertown tournament nga sugdan ning Sabado, Marso 9, 2024, sa ilang sports complex.
Moabot sa 12 ka teams ang magkombati sa matag tuig nga torneyo, nga nagdalit og P500,000 nga kinatibuk-ang ganti.
Ang torneyo gibahin sa duha ka mga grupo diin naglangkob sa Group A mao ang Argao, Aloguinsan, Malabuyoc, Badian,
Dumanjug, ug Ronda samtang naa sa Group B mao ang Sibonga, Samboan, Barili, Dalaguete, Boljoon, ug Alcantara.
Sa premirong duwa, magsangka ang Ronda ug Badian karong alas 6:45 sa gabii samtang mosunod ang engkuwentro sa Barili batok sa Samboan.
Karong Dominggo, Marso 10, 2024, magkombati ang Malabuyoc batok Badian sa alas 6:45 sa gabii unya mosunod ang panagparang sa Sibonga batok Boljoon.
Ang kampyon sa torneyo makabulsa og P200,000, makadawat og P150,000 ang 2nd placer, P100,000 sa 3rd placer samtang P50,000 sa 4th placer.
Sulod na sab sa pipila ka mga tuig nga aktibong nagpasiugda og torneyo sa nagkadaiyang natad sa paugnat sa kusog ang Moalboal isip tipik sa ilang programa sa sports tourism.
Ang Moalboal nabantog sa ilang “sardines run” ug maanindot nga diving spots.
Human sa basketball, ang Moalboal mopahigayon og chess seminar, simul, ug torneyo sa chess, arnis, dayon-dayon volleyball, ug Mobile Legends. (ESL)