MOST wanted person nga dunay pending warrant of arrest sa kasong frustrated parricide, murder ug homicide ang nadakpan sa gilusad nga manhunt operation sa Mabolo police station alas 10:50 sa Huwebes sa gabii Hunyo 20, 2024.
Ang akusado giila nga si alyas Melvin, 34, taga Purok 6, Barangay Balagunan, Sto. Tomas Davao del Norte apan kasamtangan nga nag tago sa Barangay Nivel Hills sa dakbayan sa Sugbo duol sa usa ka dakong hotel.
Ang Mabolo police station sa pagpangulo sa hepe niini nga si Police Major Romeo Caacoy Jr naka kuhag kasayuran gikan sa ilang counterpart sa Sto. Tomas Municipal police station sa probinsya sa Davao del Norte labot sa presensya ni Melvin sa Sugbo.
Ila gilayon nga gikuha ang warrant of arrest niini nga giluwatan ni Judge Carmel Gil Grado sa RTC 11, Branch 4, sa dakbayan sa Panabo Davao del Norte sa kasong Frustrated Parricide, Murder ug Homicide nga walay gitugot nga pyansa ang korte.
Human makuha ang gitagoan niini ila gilayon gi umol ang tracker team inabagan sa Regional Intelligence Unit 11, ug RIU 7 ug gipahigayon dayon ang pag dakop kang Alyas Melvin. (AYB)