Nangihi gawas sa diskohan sa Minglanilla, gipusil

SunStar Minglanilla
SunStar Minglanilla

Samdan ang usa ka 24 anyos nga lalaki human pusila samtang nangihi gawas sa diskohan, ala 1:48 sa kaad­lawaon, Dominggo, Hulyo 7, 2024, sa Barangay Cuanos, lungsod sa Minglanilla.

Ang biktima giila nga si alyas Kerbie, 24, molupyo ra usab sa maong lugar nga nakaangkon og samad pinusilan sa tangkugo.

Sa imbestigasyon sa Minglanilla Police Station sa pagpangulo sa hepe niini nga si P/Maj. Mark Don Alfred Leanza, nasayran nga nigawas ang biktima sa diskohan aron mangihi kilid sa karsada.

Apan human siya mangihi, kalit lang siya nga gipusil sa luyo nga bahin nga niresulta sa iyang pagkahagba.

Dali siya nga gidala sa Ming­lanilla District Hospital samtang dali nga miresponde ang mga polis ug milusad sa imbestigasyon.

Nigawas sa pakisusi nga dunay nakakita sa pagpamusil nga mao si alyas Jash, 21, ug miila sa suspetsado nga si alyas Ennel, 29, nga silingan ra usab sa biktima.

Gilusad dayon ang manhunt ug dunay nakakita nga naa ra kini sa balay sa iyang iyaan sa Barangay Vito nga daling giadto sa mga polis ug gisikop dihadiha dayon.

Matod ni Leanza, panimawos ang motibo sa krimen human nga gisumbag matod pa sa biktima ang amahan sa suspetsado.

Nakita sa suspetsado ang pagsumbag ni alyas Kerbie sa iyang amahan ug tungod niini nipauli ni sa ilang balay ug nagkuha’g armas dayong pusil niini samtang kini nangihi.

Kasong attempted murder ang giandam nga kaso sa kapulisan batok sa suspek. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph