Usa sa construction worker nga giingong tigdawat sa supply sa ilegal nga drugas gikan sa usa ka dakong drug personality nga nabilanggo sa Abuyog Penal Colony sa Southern Leyte, nadakpan sa buy-bust sa mga sakop sa Provincial Intelligence Unit (PIU) sa Cebu Police Provincial Office (CPPO), alas 5:40 sa hapon, Sabado, Agusto 10, 2024, sa Purok Guyabano, Barangay San Roque, dakbayan sa Talisay.
Ang suspek giila nga si Givanni Culanag Gomez, 38, taga Sitio Laray, Barangay San Roque, siyudad sa Talisay.
Nasakmit ang gituohang shabu nga motimbang sa 150 gramos nga dunay standard drug price nga P1,020,000. Usa ka semana nga gipaubos sa monitoring si Gomez human nigawas ang iyang pangalan sa mga nanglabay nga mga dakop nga siya ang tinubdan sa ilegal nga drugas.
Sa impormasyon nga nakuha sa mga operatiba sa PIU sa CPPO nasuta nga si Gomez ang hulgan sa supply sa nga drugas sa usa ka drug personality ug mao na usab kini ang moapud-apod niini sa ilang kustomer sa dakbayan sa Talisay ug mga silingang kalungsoran ug siyudad sama sa Minglanilla paingon ngadto sa sa habagatang bahin sa lalawigan sa Sugbo. (AYB)