Padayon ang dominasyon sa Philippine squad Strong Group Athletics (SGA) sa sayong bahin sa 33rd Dubai International Basketball Championship sa Al Nasr Club sa Dubai, United Arab Emirates.
Ang SGA ninglampornas sa Syrian basketball squad Al Wahda, 89-67, aron irehistro ang ikaduha nilang sunodsunod nga kadaugan niadtong Sabado sa gabii, Enero 20, 2024.
Gipakita ni UAAP Season 86 Most Valuable Player (MVP) Kevin Quiambao nga makakombati na siya’g insakto sa international level human niya napangulohan ang kadaugan pinaagi sa iyang game-high 24 puntos lakip na niini ang perpektong unom ka three-point shots.
Nangigo sab ang kauban ni Quiambao sa La Salle Green Archers nga si Francis Escandor, kinsa nitali og 5-of-1 sa three-point area sa iyang pagmugna og 18 puntos.
Si Gilas Pilipinas naturalized player Andray Blatche nakabawi sa iyang butlog nga duwa sa premirong kadaugan sa SGA pinaagi sa pagmugna og 12 puntos samtang niamot og lima ka mga puntos si kanhi National Basketball Association (NBA) All-Star Dwight Howard.
Sayong nanginit ang opensa sa SGA ug nakaposte dayon kini’g 23-14 nga labaw nga wala na nila buhii hangtod na sa katapusang gutlo.
Dihang ningburot ang labaw sa SGA ngadto sa 82-55 sa nahabiling 4:15 minutos, naninggit na ang Filipino fans sulod sa venue og “uwian na!” (ESL)