Maayo na sab nga nakaduwa ang Cebu FC ug ilang gipangsikaran ang Philippine Airforce FC, 5-0, sa Philippines Football League (PFL) niadtong Dominggo, Mayo 19, 2024, sa Dynamic Herb Sports Stadium sa Talisay City.
Si Chima Uzoka maoy naghatag sa Cebu FC og sayo nga labaw pinaagi sa iyang goal sa ika-18 minutos. Nahuman ang 1st half nga mao ra kini nga goal ang narehistro.
Apan lahi na ang dagan sa estorya sa 2nd half ug nagsugod na ang dominasyon sa Cebu FC.
Nagsugod kini dihang wala tuyoang napasulod ni Philippine Airforce defender Anthony Albor ang bola sa goal sa Cebu FC sa sayong bahin sa 2nd half.
Giinat ni Japanese winger Rintaro Hama ang labaw sa Cebu FC sa ika-64 ka mga minuto.
Gisundan kini og goal ni Dutch midfielder Guytho Mijland sa ika-89 ka mga minutos ug ni Yoji Selman paglabay sa upat ka mga minutos.
Sa PFL table, ang Cebu FC naa sa ikaupat nga puwesto dala ang 15 puntos.
Ang Stallion Laguna FC maoy nag-una, ikaduha ang Kaya FC-Iloilo ug ikatulo ang Davao Aguilas FC.
Naa sa ikalima ang United City FC ug ikaunom ang Manila Digger FC.
Mobalik ang aksyon sa torneyo karong Mayo 25, 2024. / EKA