DAW lungag sa dagom ang gilutsan sa University of Cebu (UC) Baby Webmasters una nila nabuntog ang University of San Jose-Recoletos (USJ-R) Baby Jaguars, 63-60, aron angkunon ang kampyunato sa duha ka adlaw nga Mayor Carlo Villamor Cup Fiesta Basketball League ning bag-uhay lang sa lungsod sa Carmen, Cebu.
“Happy kaayo ko kay dili sayon pildehon ang USJ-R. Makaingon ko nga hard fought win gyud,” matod ni Baby Webmasters coach Joever Samonte.
Gipasabot ni Samonte nga wala siya magdahom og dako ning maong torneyo gumikan kay bag-o ang kadaghanan sa iyang mga sakop ug lupig sab sila sa gitas-on.
“Ang akong instruction sa mga bata nga mo-pressure defense lang gyud kay gagmay mi,” dugang ni Samonte.
Gipangulohan ni Jake Yong ang Baby Webmasters pinaagi sa iyang 11 puntos samtang ningdugang og siyam ka puntos matag usa sila si Carlo Salgarino ug Burj Gabriel Lapu-os.
Sa kadaugan, naangkon sa Baby Webmasters ang P25,000 nga labing dakong ganti sa torneyo.
Kini maoy ikatulong kampyunato nga naangkon sa Baby Webmasters ning tuiga sunod sa ilang paghari sa Batang Pilipino Basketball League (BPBL) Region 7 U18 tournament ug ‘Municipality of Compostela Mayor’s Cup 2024.’
Matod ni Samonte nga plano nilang mosalmot pa og laing mga torneyo isip tipik sa ilang pagpangandam sa umaabot nga 2024 Cebu Schools Athletic Foundation Inc. (Cesafi).
Puntos matag usa:
UC (63)Yong 11, Salgarino 9, Lapuos 9, Bayug 7, Buot 7, Dela Puerta 4, Cagayao 4, Romanos 4, Pagalan 3, Gilbuena 3, Sotto 2
USJ-R (60) - Tan 14, Chua 8, Capangpangan 8, Mack 7, Toring 5, pasaol 5, Epa 4, Candia 3, Pepito 3, Yanong 2, Narvaez 1. (ESL)