Usa ka lalaki ang nadakpan atol sa gilusad nga hot pursuit operation sa kapulisan human giingong nanggakos ug nanulis alas 6:30 pagka Dominggo sa gabii, Agosto 25, 2024 sa Purok Talong, Barangay Tuyan, Dakbayan sa Naga.
Ang biktima gitago sa pangalan nga Sally, 49, minyo, samtang ang suspek ginganlan og Renato, 27, ulitawo.
Gikataho nga nakadawat og tawag ang Naga City Police Station gikan sa usa ka concerned citizen ug mipahibawo sa nahitabong pagpanulis hinungdan nga milusad dayon ang kapulisan sa operasyon.
Sa inisyal nga imbestigasyon sa kapulisan, paingon na unta ang biktima mopauli apan kalit lang nga mibabag ang suspek.
Didto na nga gigakos sa suspek ang biktima ug gisampungan ang baba niini hinungdan nga nailog ang bag nga may sulod nga cellphone, kwarta, uniform, rosary, dragon fruit, pan, glass ug payong.
Atol sa pagdakop sa suspek, P800 na lang ang narekober sa kapulisan. (DVG)