KIDAPAWAN CITY - Dumot o personal nga kasuko ang gilantaw sa mga awtoridad nga motibo sa pagpusil-patay sa usa ka estudyante alas 11:15 sa buntag,Miyerkules, Nobiyembre 29 sa probinsiya sa Cotabato.
Giila ang biktima nga si John Rey Cabuga, 21-anyos, ulitawo, Grade 11 student sa Datu Dalandag National High School sa Barangay Ginatilan Pikit Cotabato ug nagpuyo sa Purok 6, Brgy. Baliki, Midsayap, Cotabato.
Matud ni Pikit Chief of Police, Major John Arvin Cambang, nga duha ka wala mailhing suspetsado ang nisulod sa tunghaan ug dihang ilang nakita ang biktima gipusil dayon nila kini gamit ang kalibre .45 nga pistola.
Daling misibat ang mga mamumuno sakay sa motorsiklo paingon sa hilit nga dapit sa Pikit SGA-BARMM.
Dead on the spot ang biktima dihang nakaangkon kini og samad pinusilan sa iyang ulo.
Milusad dayon og hot pursuit operation ang puwersa sa 90th Infantry Battalion Philippine Army ug PNP apan wala na nila maabti ang mga suspetsado.
Matod sa mga magtutudlo nga buotan ang biktima ug matag walay klase, nag-duty kini sa usa ka Cafgu detachment duol sa Datu Dalandag National High School.
Gisuspenso sa Datu Dalandag National High School ang ilang klase sugod Nobiyembre 30 ug wala pa mahibaw-i kung kanus-a kini ablihan.
Si Pikit Mayor Sumulong Sultan ug Cotabato Governor Emmylou "Lala" Taliño-Mendoza kusganong mikondena sa pagpusil-patay sa estudyante.
Sa pagkakaron ginaimbestigahan na sa Pikit PNP ang maong hitabo.