ANG nasuspenso nga si Davao del Norte Governor Edwin “Kuya Gov” Jubahib mipadayag sa iyang kadismaya sa giingong pagpang-harass sa Civil Security Unit sa Tagum City.
Sa Facebook post ni Jubahib, Abril 25, 2024, suma niya nga ang pagpanghasi gipangunahan ni Retired Police Major Mike Tolin ug Retired Police Major Abarquez, nga sakay suma pa sa sakyanan sa City Government of Tagum nga may pula nga plaka.
“Apan ngano man miabot man sa punto nga miabot man ang grupo sa City Government of Tagum aron mang harass sa mga tao nga anaa sa kapitolyo," suma ni Jubahib.
Dugang niya nga sila Tolin ug Abarquez empleyado sa local government unit (LGU) sa Tagum ug gidesignar ni Tagum City Mayor Rey Uy isip bodyguards sa anak niini nga si Acting Davao del Norte Governor De Carlo "Oyo" Uy.
Dugang niya sila Tolin ug Abarquez may kauban nga 15 ka indibidwal nga nakamaskara.
“Nasorpesa pod ko sa presensya sa mga pulis nga misulod sa kapitolyo nga walay dala nga written order naniid sa palibot ug murag naghulat sila sa posibleng komusyon nga mahitabo nga kagubot."
Gikwestiyon sab ni Jubahib ang otoridad sa CSU sa LGU of Tagum nga manghasi og tawo sa kapitolyo, nga suma pa wala silay saktong dokumento nga makasuporta sa ilang gihimo.
Gikabutyag nga sa Memorandum Order No. 7, giisyu Abril 23 ug gipirmahan ni Oyo Uy, nga ang koneksiyon sa tubig ug kuryente sa kapitolyo ang pawngon bisan og may ubang ahensiya ang nag-opisina sa kapitolyo.
“Kining tanan gihimo nila sukwahi kaayo sa ginsulti ni Vice Governo Oyo Uy nga dili siya interesado sa posisyon," dugang ni Jubahib.
Gipasabot sab ni Jubahib nga taliwala sa 6-diyas nga suspensiyon nga gipatuman kaniya, ang serbisyo sa ahensiya sud sa kapitolyo ang nagpadayon.
“Fully functional or operational gihapon ang tanan nga mga opinsina sa kapitolyo bisan pa sa mga opisina nga anaa sa main building."
Gidasig niini ang mga residente sa Davao del Norte nga ipatigbabaw ang kamatuoran ug kontrahon ang pagpanghasi. (RGP)