MOABOT sa 1,500 ka pamilya nga naapektuhan sa Bagyong Kabayan gikan sa mga hilit nga lugar sa Davao Oriental nakadawat og food packs.
Sa Facebook post sa Provincial Government sa Davao Oriental, Biyernes, Disyembre 22, 2023, mga 1,564 pamilya gikan sa mga Barangay Pichon, munisipalidad sa Caraga, Davao Oriental nakadawat og food packs gikan sa lokal nga panggamhanan sa Davao Oriental ug sa Department of Social Welfare and Development Office (DSWD).
Ang mga personahe sa gobyerno nakaabot sa lugar pinaagi sa helicopter sa Philippine Air Force, kay ang pag-adto ning lugara lisud kaayo tungod sa bag-ohay pang pag-igo sa bagyo nga Kabayan hinungdan sa pagkahugno sa Lamiawan Bridge.
Ang tulay mao lang ang nag-inusarang nagkonekta sa barangay ngadto sa Poblacion proper. Nalain ang komunidad ug nakasinati og daghang mga pagdahili.
Ang lokalidad sa Davao Oriental maoy usa sa mga lugar sa Mindanao nga grabeng naapektuhan sa bagyo nga miigo sa Pilipinas niadtong Disyembre 18, 2023. Nitugpa ang bagyo sa Barangay Concepcion, Manay, Davao Oriental ug mipaulan og kusog nga miresulta sa mga pagbaha ug pagdahili sa daghang bahin sa Davao Region.
Sa katikarang taho sa OCD niadtong Disyembre 20, 2023, mga P4,322,006.7 ang gigahin aron nga itabang ug itunol ngadto sa mga naapektuhang mga pamilya sa Davao Oriental ug Davao de Oro.