GIPAKATAP sa Davao City Police Office (DCPO) ang gibanabana nga 170 ka mga polis aron nga hugtan ang seguridad alang sa usa ka semana nga pagduso sa certificate of candidacy (COC) alang sa May 2025 midterm elections.
Sayo niining semanaha, gisulti ni DCPO spokesperson Captain Hazel Tuazon ngadto sa mga tigbalita sa Davao nga ang ihap sa "augmented law enforcers" alerto sa "internal and external" nga mga lugar sa buhatan sa Commission on Elections-Davao Region (Comelec-Davao) sa R. Magsaysay Park, Poblacion District ning dakbayan.
Samtang, sa lahi nga paghinabi sa radyo kang Major Richeen Lagnayo, Acting Station Commander sa Sta. Ana Police Station, gisulti sa opisyal nga ang Comelec-Davao nag-abiso nga duna lay tulo ka suporter o kauban sa matag usa sa nagtinguha nga modagan ang gitugtan nga mosulod sa lugar ug moduyog kanila atol sa ilang pagduso sa ilang kandidatura aron nga makubsan ang mga tawo ug mapakgang ang kasamok nga dunay kabahin sa eleksiyon sa lugar.
Gitataw ni Lagnayo nga mga suporter wala gidid-an sa pagdala sa ilang election banners basta mosunod sila sa giimplementar nga “don’ts and do's" ug uban pang mga protocol sa seguridad nga gihikyad.
Niadtong Lunes, Septyembre 30, 2024, gikanayon sa DCPO nga ang katapusang adlaw sa voter registration nagmalampuson nga way mga di maayong panghitabo ang gitaho, nga nagkanayon, “Walay na observed nga influx sa tao."
Sukad sa pagsugod sa voters registration niadtong Pebrero 12, karong tuiga, nakaproseso ang Comelec central office og kapin 6.9 milyon nga aplikasyon kon diin nisumada og 236,442 voter applications ang natala sa unang adlaw sa "sign-up" nga kalihukan.
Gibutyag sa Comelec nga Bangsamoro Autonomous Region in Muslim Mindanao (BARMM) dunay registrants nga 12,800, Davao dunay 11,671, ug Soccsksargen dunay 11,115.
Samtang ang Northern Mindanao dunay 10,687 registrants, Caraga dunay 8,146, ug Zamboanga Peninsula adunay 7,200. (DEF)