GIKUSTODIYA na sa Bunawan Police Station ang drayber sa prime mover truck human nakaligis og duha ka mga babaye, alas 10:13 sa buntag, Miyerkules, Oktubre 25, 2023, sa Purok 11, Budbud, Barangay Bunawan, Davao City.
Sa report sa Bunawan police, mitabok ang duha ka mga babaye, (mga pangalan wala pa gipagula) diin aksidente kining nasaghiran sa miagi nga container van nga prime mover truck.
Sa maong higayon, nasulod ang usa sa ilawom, kinsa nalatayan sa ligid, samtang ang usa nakahiagom og grabe nga samad.
Patay diha dayon ang usa samtang ang laing usa daling gidala pinaagi sa TRABMOC Responders ngadto sa Southern Philippines Medical Center (SPMC).
Ang drayber sa prime mover truck nga dunay plate number TTU 134 giila nga si Jemvar Cantila Melendres, hamtong ang pangedaron.
Nagpahinumdom ang awtoridad labi na sa mga tawo nga manabok sa kalsada nga seguraduhong layo pa gyud ang sakyanan una manabok.
Mohatag sab og sinyas sa kamot ugaling motabak aron mapahimangnoan ang drayber nga sila momenor.