2 baktin gikamang, gilugos

2 baktin gikamang, gilugos

KIDAPAWAN CITY -- Napusgay sa wa pa sa panahon ang pagkababaye sa duha ka baboy nga baktin human giingong gilugos sa suspek alas 8 sa gabii, Biyernes, Marso 8, 2024 sa Arakan, Cotabato Province.

Sa karon, padayon pang giila ang suspek.

Matud ni Marivic Martinez kinsa maoy tag-iya sa mga baktin nga ilang nadiskubrehan nga gipanamastamasan ang ilang binuhi sa wala pa mailhing suspek sulod sa alad o tangkal sa ilang payag unahan og dyutay sa ilang balay.

Giingong ang duha ka mga baktin gilugos tungod kay nakita nilang nagkadugo ug naghubag pa ang mga kinatawo niini.

Ila sab nga nakita ang mga lama sa dugo sa kamot sa tawo sa kahoy sa tangkal ug ang nahibilin nga brief niini.

Sa wa pa masayri ang hitabo, gipakaon pa ang duha ka baktin sa tag-iya alas 5:30 sa hapon ug alas 9:00 sa gabii sa susamang adlaw.

Apan sa dihang gisusi ni Marivic uban ang iyang bana, ang mga baboy human nila madungog ang kabanha niini, ilang nadiskubre ang pagpanglugos sulod sa tangkal.

Dugang pa ni Martinez nga ang duha ka baboy nga baktin lang ang gilugos ug wala apila ang anay. Gawas sa mga nahisgutan, aduna sab lain pang mga baboy sa sulod sa tangkal apan pulos mga lalaki.

Human sa nahitabo, nagpasidaan si Marivic sa ilang mga silingan nga mag-amping, magbantay ug mag-igmat tungod sa gawasnon pang suspek nga giingong manyak nga posibleng mamiktima sab og mga babayeng molupyo sa ilang dapit.

Gipatala na sa magtiayon ang hitabo ngadto sa Arakan Municipal Police Station ug giimbestigahan na.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph