2 gidudahang kaso sa mpox gibantayan

HUGOT nga gibantayan karon sa Department of Health-Soccsksargen (DOH-12) ang 2 ka gidudahang kaso sa Monkeypox o mpox sa rehiyon.

Kini ang gikompirma ni DOH-12 Regional Epidemiology Surveillance Unit head Medical Officer IV Dr. Dyan Parayao.

Matud ni Parayao, mga gisuspetsahan nga pasyente dunay mga sintomas sa mpox nga mao ang mga rashes, hilanat ug mga samad.

Dugang ni Parayao nga ang ilang mga sample gipaubos sa confirmatory test sa Research Institute for Tropical Medicine kon RITM sa Manila.

Kalabot niini, gihangyo ni Parayao ang publiko nga magmabinantayon batok sa sakit nga mpox.

Hinuon, gipugngan ni Parayao ang mga bansagon sa duha ka gisuspetsahan nga pasyente sa mpox kinsa gipahimutang na alang sa 21-ka adlaw nga isolation.

Ila sab nga nailhan ug gi-quarantine ang mga tawo kinsa closed contact sa duha ka mga nahisgutan.

Hinuon, wala pa nila ma-establisar ang kaagi sa biyahe ug pagkaladlad sa duruha sa posibleng o nakompirma nga kaso sa mpox.

Giingon nga ang mpox mahimong makuha pinaagi sa close contact uban sa tawo kinsa duna niini nga sakit, uban ang mga nakontamina nga mga butang, o na-inpekted nga hayop.

Panahon sa pagmabdos, ang kagaw mahimo sab nga mapasa ngadto sa masuso o fetus, o ang bag-ong natawo nga bata atol o human sa pagpanganak niini, sumala sa World Health Organization. (EEF)