2 ka edaran napalgang patay

2 ka edaran napalgang patay
Hulagway gikan sa Davao City Police Office

NANAWAGAN karon ang Ecoland Police Station sa mga nawad-an og kabanay nga dunay usa ka edarang babaye ang napalgang wala nay kinabuhi kinsa gidala na karon sa Villa-Gan Funeral Parlor sa Toril, Davao City.

Sa Facebook post sa PS15 Ecoland gipahibalo nila ang publiko nga dunay usa ka tiguwang ang wala nay kinabuhi kinsa gituohang nalumos ug napalgan sa baybay sa Capareda Compound, Coastal Rd, Brgy. 76-A Bucana, Davao City niadtong Disyembre 22, 2023.

“Kining biktima gisuspetsahan nga anaa sa 60-70 ang edad, naa sa 5 ft- 5'2" ang katas-on, nakasuot og black Adidas T-shirt ug leggings, ug adunay suot nga gold bracelet ug gold necklace,” saysay sa FB post sa Ecoland PNP.

Niadtong Biyernes, Enero 5, 2024, ang Ecoland PNP subling nagpahibalo sa publiko nga wala pa nailhan ang napalgang patay diin mamahimong motawag sa mga numerong 0919-093-2408 o magpadala'g mensahe sa DCPO PS15 Ecoland Facebook Page kung dunay nawad-an og kabanay.

Sa pikas bahin, sa Toril District, usa sab ka patay'ng lawas sa lalaki nga nadugta na ang nakaplagan kilid sa kanal sa bakanteng lote sa Guardian St., Luisdeña Compound, Brgy. Lizada, Toril District alas 12:30, Biyernes sa udto, Enero 5, 2024.

Sumala ni Police Captain Marlon Donguilab, station commander sa Toril Police Station 8, wala na’y suot ang maong lalaki, lisud nang mailhan sanglit nadugta na kini ug gibana-banaang nag edad og 55 ngadto sa 60-anyos.

Padayong ginasuta sa kapulisan ang ilhanan sa maong lalaki kinsa anaa sab karon sa usa ka punerarya sa Toril, Davao City.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph